Albistea entzun

AIRETIK

Testuingurua

Jagoba Salvador -

2021eko irailak 12

Lagun sentitu izan dut beti musika. Bizitza osoan zehar nirekin izan dudan bidaide. Entzuten dugun musikak aztarnak uzten ditu gugan, eta arrasto horiek gure nortasuna markatzen dute. Hein batean, musikak egiten gaitu garena. Pertsonon etengabeko eraldatze prozesu emozionalarekin badu, behintzat, zerikusirik. Baina, zenbateraino daude lotuta entzuten dugun musika eta gure izaera?

Ez dut uste inork erantzun zehatzik duenik. Hori bai, momentu bakoitzean entzuten dugunak eta garen pertsonak lotura dutela ukaezina dela iruditzen zait. Barneratzen dugun arteak gure ezagutza eta testuingurua aberasten du eta gure pentsatzeko modua baldintzatzen du, nolabait. Duela hogei urte, duela hamar, duela bost edo atzo entzun nuen musika ez da bera, eta ni ere beste norbait naiz. Baina, musikak eraldatzen gaitu edo eraldatzearen ondorio da musika?

Usteak uste, ikerketak ikerketa, pertsona baten musika ibilbideak pertsonalaz ere asko esan dezake. Gaurko gu-ak asko zor dio bide horri, azken finean prozesu horren emaitza gara. Pertsona bat, are gehiago musikari bat, sakonago ezagutu eta ulertzeko modu interesgarriagorik ez zait okurritzen bere artista, disko eta abesti kutunei buruz aritzea baino.

Hori da Ekain Perezek Lore-Hostoak irratsaioan egiten duena. Aldiro sortzaile bat ostokatzen du, hau da, gonbidatuaren betiko euskal kanta kutunetan oinarritzen da bere musika mapa osatzeko. Bidaia formako solasaldien bidez, artistaren unibertso eta eboluzio musikalean murgiltzen gara. Musikariaren gomendio eta lan propioak uztartuz, musika erretratu eder bat oparitzen digu atal bakoitzak. Sortzailearen eragin eta inspirazio izan den horretan sakontzea bere artea eta pentsaera ulertzeko gakoetako bat izan daiteke.

Musikaren inguruan dabilen Pitchfork webgunearen Youtube kateko Under the Influences atalak ere antzeko planteamendua du. Bertan, sortzaileek musika tresna jakin bat ulertzeko duten moduan eragina izan duten historiako musika pasarteez hitz egiten dute. Lehenengo pertsonan egindako analisi formatu hori ez da oso ohikoa, eta aberasgarri bezain argigarria da.

Eta zuk, aukeratu behar izanez gero, zein bost euskal kanta aukeratuko zenituzke? Nork utzi du arrastoa zure bizitzan? Ez da erraza aukeratzen, baina egin ariketa eta konturatuko zara testuinguruak berebiziko garrantzia duela; ez musikan bakarrik, baita bizitzan eta nortasunean ere.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Itziar Ituño aktorea ©Javier Lizon / Efe

‘La casa de papel’ Netflixeko lehen tokian jarri da AEBetan

Urtzi Urkizu

Iruñeko sanferminak eta Pasaiako portua aipatzen dira azkeneko ataletan. Iñigo Aranbarri Azkoitiko (Gipuzkoa) aktoreak rol txiki bat jokatzen du. Protagonisten artean dira Itziar Ituño, Ramon Agirre, Ahikar Azkona eta Najwa Nimri.

Wikipediaren sakelerako aplikazioaren ikonoa. ©SASCHA STEINBACH / EFE

Euskarazko Wikipediak 20 urte bete ditu gaur

Edu Lartzanguren

Gaur, Wikipedia lantzen duten munduko hizkuntzen artean 33. postuan dago euskara artikulu kopuruari dagokionez, estatu hizkuntza diren hainbat eleren aurretik.

 ©ARITZ LOIOLA / FOKU

«Zifren eta datuen inperialismoaren menpe bizi gara»

Gorka Erostarbe Leunda

Krisi garai erabatekoa; pentsatzeko tarterik ere uzten ez duena. Hartu du denbora hori Iñigo Martinezek, eta egungo inertziak auzitan jarri ditu 'Mandamentu hipermodernoak' lanean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.