JIRA

Ondoreak

Angel Erro -

2018ko urriak 21
Lagun batek bidali zidan Espainiako Auzitegi Gorenaren epaiaren berria (hipoteka maileguaren zerga, orain artean bezeroak ordaindu behar izan duena, bankuak ordaindu eta, erretrospektiboki, bezeroei itzuli beharko dietela azaltzen duen berria), baliagarria izan ahal zitzaidalakoan. Nik oraindik ez dut horrelako hipotekarik. Hurrengo egunean, ostiralean, ni izan naiz beste berri bat, kontrakoa nolabait esateko, bidali diodana: aurreko epaiaren aplikazio orokorra gelditzeko agindu duela Auzitegi Gorenak berak, delako epaia berrikusteko, estatuari ekar lekiokeen ondore ekonomiko eta sozial itzelagatik. Begira-begira gelditu naiz esapideari. Ondore ekonomiko eta sozial itzela. Bide batez, lehenengo ekonomiko eta gero soziala. Enorme repercusión económica y social. «Joder aberatsak ukitzerakoan», erantzun dit lagunak. Berak bai eskatu dio banku bati hipoteka.

Orduan neure buruari galdetu diot Gorenak preso katalanak kondenatzen baditu, orduan ere epaia gelditu eta berrikusiko ote duten, eragindako ondore sozial itzelagatik. Galdetu diot neure buruari etxe kaleratzeek (ehun milatik gora Espainian krisialdia hasi zenetik), bankuek eragindakoek, ez ote duten ondore ekonomiko eta sozial itzela, neurtezina, eragiten.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna