Noiz sortua: 2020-06-03 00:30:00

Irtenbide bakarra: mendebalderantz

Gipuzkoako eta Bizkaiko arrantzaleek Asturiasko uretara jo dute antxoa handiagoen bila. Lan astea ontzian igarotzen dute, eta asteburuan itzultzen dira, errepidez. Kuota dutenez, ekain osoa egingo dute arrantzan.
Baxurako arrantzontzi bat Getariako portutik irteten, antxoa bila.
Baxurako arrantzontzi bat Getariako portutik irteten, antxoa bila. JON URBE / FOKU Tamaina handiagoan ikusi

Imanol Magro Eizmendi -

2020ko ekainak 3

Lan aste osoa Asturiasen (Espainia) itsasontzian sartuta igaro, hura Gijon edo Avilesko portuetan lotuta utzi, eta asteburuan etxera errepidez itzuli. Hori da azken asteetako errutina Gipuzkoako eta Bizkaiko arrantzaleentzat. «Gure uretan badago antxoa, baina txikia da, eta komertzialki arazoak ematen ditu. Handiagoen bila jo dute hara, baina ez dabiltza oso ondo». Azalpena Miren Garmendia Gipuzkoako Arrantzale Kofradiako idazkariarena da, baina Bizkaiko ontzietara ere estrapolatu daiteke, guztiek jo baitute hara.

Euskal arrantzaleek ez dute erraz ahaztuko aurtengo antxoaren kanpaina. Arrainaren tamainak hasiera atzeratzera behartu zituen lehenbizi; gero, COVID-19aren olatua iritsi zen, eta hark eragindako krisiak eta segurtasun neurriek sektorea astindu zuten. Azken txanpa, berriz, etxetik ia 400 kilometrora egingo dute, hori baita Gijon eta Hondarribia (Gipuzkoa) arteko distantzia. Beste urte batzuetan ere egin izan dute hori, baina ez hain luzaroan.

Arrantzaleek urte txarra izango dutela badaki Garmendiak, baina ez da ausartu kuantifikatzen. «Oraindik aste batzuk falta dira kanpaina amaitzeko. Beste urte batzuetan, garai hauetarako dena salduta genuen, baina aurten ekain osoan eutsiko diogula dirudi. Hegaluzea lehenago sartzen ez bada, behintzat». Iragan neguan Frantziako arrantzaleekin sinaturiko akordioan, ekain amaieran ezarri zuten epe muga.

Eusko Jaurlaritzaren Arrantza Behatokiaren arabera, antxoaren kanpaina arrantzontzien urteko diru sarreren %25 inguru da; horregatik ezin diote muzin egin, eta, portuko prezioak txikiak direnez, euskal ontziak kargaren zati handi bat gordetzen ari dira: «Tamainaren araberako gutxieneko prezio batzuk daude, eta, iristen ez badira, guk erosten dugu. Gatzetan mantendu edo izoztu egiten dugu, gero eraldatzeko. Prezioari eusteko modu bakarra da».

Arrantzaleentzat txarra izango da, eta kofradientzat are okerragoa ziurrenik. Antxoa delikatua da, eta gertuen dagoen portuan deskargatu behar da.«Salmenta gehienak ez dira gure lonjetan egin, eta sumatuko dute. Kanpainako lehen astean salmenta batzuk egin ziren hemen, baina hartaz geroztik kanpoan egin dira». Behatokiak maiatzaren 20an argitaratu zuen azken txostena, eta hark berretsi egiten ditu Garmendiaren hitzak. Maiatzaren lehen astera arte iaz baino %80 gutxiago deskargatu zuten euskal portuetan. Datu horretan eragin zuzena du COVID-19aren etenak, baina hortik aurrerako arrantza ia guztia Asturiasen deskargatu dute.

Gaixoturik gabe

Sasoiak albiste on bakarra ekarri du: ez da arrantzaleen arteko kutsadurarik egon. Proba egin zieten guztiei, baita neurri zorrotzak ezarri ere. Bi kasu bakarrak lehorrean izan ziren, eta marinelak ez ziren ontzira igo. «Beldur handia zegoen», onartu du Garmendiak. «Marinel bat gaixotuz gero, ontzi osoak hamabost egunez lotuta egon behar zuen, eta agian tarte horretan iritsi zitekeen arrain kolperik onena. Hori dela eta, Kantauriko ontzi guztien artean babes diru-funts bat sortu genuen, kasuren bat balego ontzi hari laguntzeko, eta zorionez ez dugu erabili».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Osakidetzako langile bat Txagorritxuko laborategi batean lanean. ©Gorka Rubio, Foku

Justizia Auzitegi Nagusiak ebatzi du Osakidetzak arriskuan jarri dituela langileak

Ainhoa Larretxea Agirre - Mikel P. Ansa

Osagileen sindikatuek jarri zuten salaketa, eta ekainaren 16an egin zuten epaiketa. ESK sindikatuak Nekane Murga Osasun sailburuaren eta Osakidetzako zuzendaritzaren dimisioa eskatu du. Osakidetzak, ordea, «positibotzat» jo du ebazpena, epaileak atzera bota dituelako sindikatuen «eskari gehienak».

Jendea paseoan, konfinamendua arintzeko lehen fasean. ©JON URBE/ FOKU

Jaurlaritzak ziurtatu du COVID-19aren agerraldiak «kontrolatuta» daudela

Irati Urdalleta Lete

Beste hamalau positibo eta hiru hildako daude. Jaurlaritzak pentsatu du neurriak areagotuko dituela jende pilaketak «mantenduz eta orokortuz» gero

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna