Jokabide bera erabili dute Alavesek eta Realak irabazteko

Gaizki hasi, hobera egin, markagailua irauli, eta garaipena lortu. Hala eskuratu zituzten hiru puntuak Alavesek eta Realak, atzo. Iñigo Juaristirenei aurreneko minutuan sartu zieten gola, baina atsedenaldirako aurretik ziren jada. Bigarren zatian, gainera, gol festa iritsi zen (4-1). Aldiz, ia azken hatsean lortu zuen Realak markagailuan aurreratzea. Natalia Arroyorenak 2-1 nagusitu ziren, eta bigarren zatian sartu zituzten garaipenerako bi golak.

Alavesek ez zeukan nolanahiko partida. Alhama azken sailkatuaren etxean galdu ostean, beharrezkoa zuen garaipena Lehen Mailan mantentzeko eskubidea ematen duten postuetara hurbiltzeko. Aurreneko minutuan, ordea, iritsi zen aurkariaren gola. Valentziak gaizki kokatuta harrapatu zituen Alaveseko atzelariak, eta bisitariak aurreratu zituen Fiamma Ianuzzik.

Kosta egin zitzaion Alavesi burua altxatzea, baina Marta Sanadrik bost minutuan irauli zuen markagailua. 30. eta 35. minutuetan gol bana sartu zuen Donostiako aurrelariak, eta 2-1ekoarekin joan zen partida atsedenaldira.

Bigarren zatian Valentziak arriskua eraman zuen Alavesen atera, baina Cristina Auñonek lehenengo, eta Elba Vergesek ondoren, beste bi gol egin zituzten etxekoentzat. Hauspoa emango dion garaipena lortu zuen talde babazorroak, eta Espainiako Kopako partidari begira jarriko dira gaurtik aurrera.

Realak ere markagailua irauli zuen, baina sufrituta. Cecilia Marcosen lesioa buruan zutela-edo —belauneko lotailu gurutzatua apurtu du bigarren aldiz—, gaizki zelairatu ziren Arroyorenak. Alhama, nahi bezala aritu zen hasieran, eta 0-1 aurreratu ziren.

Bigarren zatia hasi eta berehala egin zuen Realak berdintzeko gola korner batean, eta 82. minutuan iritsi zen garaipenaren gola. Manuela Vanegasek egin zuen.

Bestalde, gaur izango da Athleticen txanda. Iraia Iturregiren taldea etxean arituko da Las Planasen aurka, eta, jaisteko postuetara gehiegi ez hurbiltzeko, beharrezkoak ditu hiru puntuak.