Noiz sortua: 2019-08-18 00:30:00

Mallorca 2 Eibar 1

Ohitura bilakatu du

Iaz gertatu bezala, Eibarrek galdu egin du ligako estreinako partida talde igo berri baten aurka. Eibartarrak eskas aritu dira defentsan
Pedro Leon, baloia jaso nahian, atzo.
Pedro Leon, baloia jaso nahian, atzo. CATI CLADERA / EFE Tamaina handiagoan ikusi

Jon Eskudero -

2019ko abuztuak 18

Mallorca. Reina; Joan Sastre (Xisco Campos, 85. min.), Valjent, Raillo, Agbenyenu; Baba, Febas (Trajkovski, 74. min.), Salva Sevilla; Dani Rodriguez, Budimir (Alex Alegria, 66. min.) eta Lago Junior.

Eibar. Dmitrovic; Roberto Correa (De Blasis, 83. min.), Oliveira, Ramis, Tejero; Pedro Leon, Sergio Alvarez, Escalante (Edu Exposito, 31. min.), Orellana; Kike Garcia eta Enrich (Quique Gonzalez, 76. min.).

Golak. 1-0: Dani Rodriguezek (4. min.); 1-1: Oliveirak (57. min.). 2-1: Oliveirak, bere atean (75. min.).

Epailea. Melero Lopez. Txartel horiak: Mallorcako Joan Sastreri eta Salva Sevillari; eta Eibarreko Sergio Alvarezi, Edu Expositori eta Orellanari.

Bestelakoak. 15.127 ikusle Son Moixen.

Aurtengo denboraldia ere ez du nahi bezain egoki abiatu Eibarrek. Eskarmentua lagun, aurreko sasoietako akatsak zuzentzea zuen helburu Jose Luis Mendilibarren taldeak, eta entrenatzaileak abisua emana zuen oso zela garrantzitsua lehiari bide onean ekitea. Bada, kale egin zuten eibartarrek. Iaz Huesca igo berriaren kontra bezala, atzo ere galdu egin baitzuten beste igo berri baten aurka, Mallorcaren kontra, haren zelaian. Galtzeaz gain, irudi kaskarra eskaini zuten, gainera. Denboraldi-aurreko jokotik urrun aritu ziren. Partidari ekin bezain laster hartu zuen aurrea Mallorcak, eta bigarren zatian Eibarrek lanak berdindu bazituen ere, ez zuen puntuari eusterik izan.

Ezin okerrago hasi zuen partida Eibarrek. Lehen bi minutuetan bi abisu eman zituen etxeko taldeak, eta hirugarrenean ez zuen barkatu. Defentsako lerroan aurreratuta kokatu ziren Mendilibarren jokalariak, baina goian presiorik egiten ez zutenez, eroso jardun zen Mallorca. Zelai erditik arearako bidea erraz egiten zuten etxekoek, eta era horretan heldu zen 1-0ekoa, Dani Rodriguezen eskutik. Urduri eta galduta sentitu ziren eibartarrak, ohiko izaera eta nortasunetik urrun. Sormen jokoan azaldu ere ez ziren egin lehen ordu erdian, eta zertara jokatzen zuen ere ez zuen jakin izan taldeak. Oso kezkagarria izan zen neurketaren lehen zati luzea.

Hori ikusita, aulkia mugitu eta lehen aldaketa egin zuen Mendilibarrek. Escalante kendu eta Exposito zelairatu zuen 31. minutuan. Goiz izan arren, beste erremediorik gabe sentitu zen zaldibartarra. Eta asmatu egin zuen. Izan ere, pixkanaka behetik gora egin zuen Eibarrek. Mallorca bera ere sendotu egin zen, baina bestelako jokoa egiteari ekin zioten bisitariek. Irizpide gehiagorekin jokatu zuten baloia, eta batez ere Orellana eta Pedro Leonen arteko jokaldiek mesede egin zion taldeari. Bi hegaletatik min egin zuten bi jokalariok. Lehen zati amaieran bezala, bigarrenaren hasieran ere nabaria zen Eibar gehiago zela, eta 57. minutuan iritsi zen banakoa. Korner batean jasotako aldaratzea sareetara bideratu zuen baloia Oliveirak.

Zoritxarreko jokaldia

Berdinketa egin eta lehen helburua beteta, Eibarrek berak ere intentsitatea jaitsi egin zuen apur bat. Kontuak asko berdindu ziren lehiaren azken ordu erdian, baina bazegoen alde nabarmen bat: Eibarrek aurkariaren areara iristeko baloia asko mugitu beharra zuen, eta Mallorcak aski zituen bi pase zuzen arriskua sortzeko. Era horretan egin zuten etxekoek garaipenaren gola. Zuzen jokatu, eta hegaletik egindako erdiraketa batean bere atera bidali zuen baloia Oliveirak. Zoritxarreko jokaldia izan zen. Azken txanpan saiatu zen binakoa egiten Mendilibarren taldea, baina ez zuen lortu.

Gauzak horrela, beste behin gorako joera hartu beharrean dago Eibar, baina ez du erraza izango, laugarren jardunaldira arte ez baitu Ipuruan jokatuko.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

ENDIKA PORTILLO / FOKU ©Lehen arretako profesionalen protesta bat, iaz, Gasteizen.

Hildako bat eta 15 kutsatu gehiago izan dira, datu ofizialen arabera

Ane Eslava

Egoera «kontrolpean» dagoen arren, «zuhurtzia» eskatu du Nekane Murga Jaurlaritzaren Osasun sailburuak. Nafarroan ez da kasu berririk egon. Lehen arretako langileek protesta egin dute Bilbon.

Larrialdi zerbitzuek behin-behineko ospitale bat jarri dute Lleidan. ©Ramon Gabriel / Efe

Kataluniako Gobernuak konfinamendua ezarri die 200.000 herritarri

Berria

Lleidako eskualde batean koronabirusaren zortzi agerraldi detektatu dituzte. Eguerdian jarri dute indarrean.

Osasun langileak lanean, Gurutzetako ospitalean. ©MARISOL RAMIREZ / FOKU

Auzitegi Nagusiak dio Osakidetzak ez zuela babes baliabide nahikoa

Ainhoa Larretxea Agirre - Irati Urdalleta Lete

Osakidetzak «ontzat» jo du ebazpena, «ez dituelako aintzat hartu sindikatuen eskaera gehienak». ESK sindikatuak jarri zuen salaketa, eta ekainaren 16an egin zuten epaiketa

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna