Albistea entzun

Burkina Faso. Bi kazetariren hilketa. David Beriain

Gatazken bozgorailu

Gerra ugariren berri emandakoa zen Beriain; prentsa idatzian aurrena, ikus-entzunezkoetan gero. Ekoizpen etxe propioa sortu zuen, 93 Metros, inoren erabakien mende ez egoteko.
DISCOVERY MAX / EFE Tamaina handiagoan ikusi

Jon O. Urain -

2021eko apirilak 28

Gatazka guneetan zaildutako kazetaria zen David Beriain (Artaxoa, Nafarroa, 1977), munduko hainbat eremutako gerrak kontatzen eman baitzuen bere ibilbide profesionala. Gaztetatik joan zen atzerrira; Nafarroako Unibertsitatean ikasketetako lehen ikasturtea amaitu berritan, 18 urte zituela, Argentinako egunkari txiki batean hasi zen kazetaritzan, ustelkeria auziak ikertzen, eta irailaren 11ko atentatuen ostean hasi zen gerra kazetaritzan; La voz de Galicia-n aritu zen, eta Irakera joan zen erreportaje batzuk egitera. Prentsa idatzitik ikus-entzunezkoetara igaro zen ondoren: «Interesatzen zitzaizkidan gaiak hobeki landu zitezkeen ikus-entzunezkoekin. Motibatzen nauten gauzak egiten ari naiz orain, tokietan jendearekin esertzen eta hitz egiten. Halakoetan, errealitate dosi handiak jasotzen ari naiz», azaldu zion BERRIAri 2015ean eginiko elkarrizketa batean.

Afganistan, Irak, Darfur... Apurka-apurka, luzatuz joan zen Beriainek bertatik bertara ezagututako gatazken zerrenda. 2008an, FARC Kolonbiako Indar Armatu Iraultzaileen kanpalekuak grabatu zituen, eta Jose Manuel Porquet saria jaso zuen Diez dias con las FARC (Hamar egun FARCekin) erreportaje sortarengatik; lan horri esker, finalista izendatu zuten Bayeux-Calvados sarietarako ere.

Hain zuzen ere, esperientzia horretan ezagutu zuen Pastor Alape FARCeko idazkaritzako kide izandakoa; atzo, Alapek gogoan izan zuen Beriain, sare sozialetan: «David Beriain ezagutu nuen erresistentzia armatuaren garaietan, Bolivar hegoaldeko mendietan, bere kazetaritza jarduera koherentzia kritikoz gauzatzen». Alapek «atsekabea» azaldu du «berean» hil delako Beriain: «Egia bilatzeko arriskuan. Bidaia on, eternitatearen berriemaile».

Ikus-entzunezkoetan murgilduta, bere ekoizpen etxe propioa sortzea erabaki zuen 2012an: 93 Metros. Izenak badu azalpena, 2017an Nafarroako Unibertsitateko aldizkariari kontatu zionez: «Nire amona hil zenean sortu genuen. 98 urte zituela hil zen, eta denok genion miresmena. 93 metrokoa da haren etxetik otoitz egiten zuen elizako eserlekuraino dagoen distantzia. Izen hori jarri diogu, ez dugulako ahazten batzuetan istoriorik handienak lekurik txikienean daudela».

Ekoizpen etxe propioa sortzeko erabakiaren arrazoiak ere azaldu zituen iaz, Navarracapital.es atariak eginiko elkarrizketa batean: «Ulertu nuen lortzen nuena delikatuegia zela beste batzuen esku uzteko, azkenean nagusi batek, tokian bertan egon gabe eta iturriekin zenituen konpromisoak ezagutu gabe, erabaki zezan... Konturatu nintzen enpresaria izan behar nuela, ekoizlea».

'Clandestino' saioan

Beraz, ekoizpen etxe propioarekin egin zituen Clandestino saiorako erreportajeak, DMAX telebista katean emandakoak; horretan kontatu zituen, besteak beste, El Salvadorko indarkeria eta Mexikoko Sinaloako kartelaren nondik norakoak. Munduko talde kriminal boteretsuenetako bat da Sinaloakoa, eta lau hilabete eman zituen hango kideekin. «Saioa nire bizitzako ametsa da. Munduari begiratzeko nire modua da. Humanista izan nahi dut, inor epaitu gabe», azaldu zuen 2017ko otsailean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

CO2 neurgailu bat Iruñeko taberna batean, airearen kalitatea ona dela adierazten. ©JESUS DIGES / EFE

Nafarroako Gobernuak baieztatu egin du ostatu barruak irekiko direla

Maria Ortega Zubiate

Astelehenetik aurrera izango da; gehienez edukieraren %30 erabili ahalko dute. CO2 neurgailuak jartzen badituzte, guztiz bete ahal izango dituzte establezimenduak
<b>Zalla. </b> Gertatutakoa salatzeko elkarretaratze jendetsua egin zuten atzo Beltranen jaioterrian. ©MONIKA DEL VALLE / FOKU

Beltran bilatzeari utzita, ardurak argitzeko eskaera gailendu da orain

Ainhoa Larretxea Agirre

Jaurlaritzak jakinarazi du eten egin dutela beharginaren bilaketa. Oposizioak, gehiengo sindikalak eta Zaldibar Argituk Jaurlaritzari eskatu diote bere ardura hartzeko
Euskarazko haur eskolen aldeko manifestazio bat, iaz. ©JAGOBA MANTEROLA / FOKU

Haur eskoletako 165 familia euskarazko lerrorik gabe utziko ditu Iruñeko Udalak

Ion Orzaiz

HE Gurasoek salatu dute udalak eskola bakarrean eskaintzen duela murgiltze eredua. Bilera eginen dute asteartean, «aukerak aztertzeko»

 ©MONIKA DEL VALLE /FOKU

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.