Errusiako Munduko Kopa. ESFERAREN ERTZAK

BrasHIL

Amaia Agirre -

2018ko uztailak 8
Odolkiak ordainetan izan dira, eta halatsu gertatu zaio Neymarri ere. Mexikarrek zelai barruan komeni baino gehiago hitz egin eta kexatu zirela, eta horregatik joan omen ziren etxera. Belgikak Brasil kanporatu duenean, memoriak eta mendeku goseak eraginda, Andres Guardado arduratu da Neymarri odolkiak itzultzeaz. Brasil ere etxera.

Brasilgo selekzioaren jarraitzailea ez, baina zalea izan naiz betidanik. Gaur egun, ez dut batek irabazi edo bestea etxeratu poz eta pena handirik hartzen. Futbola batzuetan ikuskizun erakargarri bezala ikusten dut, baina gehienetan bestelakotik izaten baitu gehiago. Ez da bereziki balore aberatsen eskalan goiko mailatan jartzeko kirol eredua.

Joka dezadan leial nik ere nire memoriarekin, eta Brasilgo jokalarien jokoak nola liluratzen ninduen aitortu. 2002ko Japoniako eta Hego Koreako Munduko Kopa gogoan dut. Hiru R erraldoiak: Ronaldo, Rivaldo eta Ronaldinho. Urte horretan bosgarren aldiz irabazi zuela uste dut hain preziatua den garaikurra. Alemania izan zuen aurkari. Oliver Kahn zen europarren atea babesteko ardura zuena, txapelketako jokalaririk onena izendatu zutena. Ronaldok, ordea, bitan zeharkatu zuen atezainaren atzeko marra zuria.

Brasilgo selekzioa omen da hamabi bider FIFAren eskutik urteko talderik onenaren saria jaso duen bakarra. Hala ere, ez dakit apaizaren dozenara iristeko moduan izango diren nahi eta ere Peleren ondorengo izan nahi duten hauek. Hiru R berri baino ez zaizkit geratuko aurtengoari dagokionez buruan: ERREkor berrien gabeziaren minetik ERREkuperatu beharra, jokoa beti ez baita ERREnta.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna