Errusiako Munduko Kopa. ESFERAREN ERTZAK

Txartel gorria

Amaia Agirre -

2018ko uztailak 6
Epai bat eman aurretik edo iritzi bat osatu aurretik, beti bi aldeen berri jakitea ezinbestekoa omen da. Ados. Eta auzi honek ere baditu gutxienez bere bi aldeak. Kontua da mundialen berri ematen aritu eta oraindik ari diren zenbait kazetari erasota sentitu direla. Baina era berean kazetari horietako batek, batek behintzat bai, lekuz eta moduz kanpoko iruzkinak egin ditu jokalari batzuen gainean.

Goazen harira. Kazetari batek futbol jarraitzaile bati elkarrizketa egiten hasi eta jaso zituen lehen hitzak «nola izena duzu, polita?» izan ziren. Kazetariak berehala erantzun zion hori ez zela garrantzitsua. Kazetari horrek jarrera eta hizkera matxistak behin baino gehiagotan jasan dituela jakinarazi du. Eta hor ere egurra jaso du. Bere ogibide bereko beste batek bere irudiagatik dagoela hor eta futbolaz deus ez dakiela aurpegiratu dio. Polita ez balitz ez litzatekeela hor egongo leporatu dio.

Errusiako kaleetan albiste bat grabatzen ari zen beste kazetari bati, oharkabean etorritako futbolzale batek muxu eman zion titi bat ukituz.

Bi adibide baino ez ditut ekarriko, baina badira gehiago. Bi esku aski ez zenbatzeko. Lotsagarria eta salatzekoa.

Gertaera hauek gutxietsi eta zigortu egin behar dira, ados, baina eraso matxista jaso zuen kazetari horietako batek ere badu nondik heldu. Aurkari zuten selekzioko jokalariei buruz «oso erakargarriak dira, etsaiarekin oheratuko nintzateke. Baten batek kontsolatu beharko ditu, ezta?» esan zuen.

Inondik inora ezin da onartu eraso matxista bat. Kazetari batek gisa horretara hitz egitea ere ez, ordea.

Ez dut esan, baina esan beharrik ez zegoen, ezta? Nik hemen aipatu ditudan kazetari guztiak emakumezkoak dira, bai kritikatuak eta baita kritikatzaileak ere. Soka luzea lekarke, baina oraindik korapiloa ezin askatuta nabil.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna