Egun beltza izan zuten atzo euskal taldeek Espainiako Lehen Mailan. Bik jokatu zuten, eta biek galdu zuten, biek etxean: Athleticek, 0-1 Granadillaren aurka; eta Alavesek, 0-2 Levanteren kontra. Biak bolada txarra eten ezinda dabiltza: biek galdu dituzte ligako azken lau partidak. Sailkapenean, zuri-gorriak hamargarren dira, eta lau puntura baino ez dute jaitsiera; larriago daude zuri-urdinak, azkenak baitira.
Iraia Iturregirenek garesti ordaindu zuten gol aukerak ez aprobetxatzea. Dezente izan zituzten, baina eskas aritu ziren. Granadillak, ordea, izan zuen lehena baliatu zuen, Blomek, 23. minutuan. Gero, aldeari eutsi zion. Etxekoak gogotik saiatu ziren, eta nagusi izan ziren. Baina alferrik.
Lehiatua izan zen ere Alavesen eta Levanteren artekoa. Herrialde Katalanetako taldea koska batzuk gorago dago, eta zelaian erakutsi zuen. Halere, etxekoek oso partida ona egin zuten, eta gai izan ziren 55 minutuz eusteko. Baina Alba Redondoren eta Mayraren golek erabaki zuten lehia.
Reala, Madrilen zelaian
Gaur, Realak jokatuko du, Madrilen zelaian (12:00, Dazn). Txuri-urdinek ia ezinezko dute bigarrenez jarraian Txapeldunen Ligarako sailkatzea, hemeretzi puntura baitute hirugarren sailkatua, Levante. Baina ahal duten lan onena egin nahi dute sasoia amaitu arteko partidetan. Natalia Arroyok bi jokalari garrantzitsu faltako ditu gaur: Alejandra Bernabe min hartuta dago; eta Manuela Vanegas, berriz, zigortuta. Madril postu bat gorago dago, bosgarren, lau puntu gehiagorekin. Realak galdu egin ditu etxetik kanpo jokatu dituen azken lau neurketak.
Athleticek eta Alavesek galdu egin dute etxean
Iruzkinak
Ez dago iruzkinik
Ordenatu
