Herrada, azken metroetan

Jesus Herradak (Cofidis) irabazi zuen, atzo, Espainiako Vueltako 11. etapa, ihesalditik. Egun lasaia izan zuten tropelean. Faboritoek ez zuten mugitu nahi izan, eta ihesaldiko txirrindulariei utzi zieten etapa garaipenaren lehia. Bederatzi txirrindulariren artean jokatu zuten garaipena, eta azken 300 metroetan erasoa jo ondoren lortu zuen garaipena Herradak. Faboritoak elkarrekin helmugaratu ziren, eta Sepp Kussek (Jumbo-Visma) jarraituko du lider.

160 txirrindulari abiatu ziren atzo Lermatik Laguna Negrara. Kostata aurreratu zen taldetxo bat, baina, azkenerako, izen handiko txirrindulariak sartu ziren eguneko ihesaldian. Tropelak ez zuen jakin lehen kilometroetan zuloa ixten, eta, denbora aurrera joan ahala, handitu egin zen aldea. 26 txirrindulari sartu ziren ihesaldian, eta horietako bederatzi iritsi ziren taldetxoan amaierara.

Ia sei minuturen aldearekin abiatu zuten Laguna Negrako azken igoera. Erasoka hasi ziren azken mendateko lehen aldapetan, eta Filippo Gannak erritmo zitala ezarri zuen, Geraint Thomas taldekidearen mesedetan (Ineos). Guztien begiradapean zegoen Galeseko txirrindularia, eta hori baliatu zuen Jonathan Caicedok (Education First) erasoa jotzeko. Eskuetan zeukan garaipena, metro batzuk hartu baitzituen azken kilometroan zeudela, baina 300 metro gelditzen zirenean harrapatu zuen Herradak, eraso gogorra jo ostean. Bakarrik sartu zen helmugan espainiarra, eta hirugarren garaipena lortu du Espainiako Vueltan.

Atzeko taldean indarrak gorde zituzten taldeburuek. Etapa gogorrak gelditzen dira oraindik Asturiasen eta Pirinioetan, eta nahiago izan zuten saiakera handirik ez egin. Remco Evenepoel (Quick-Stepp) mugitu zen azken metroetan, baina ondo itsatsi ziren haren gurpilera, eta elkarrekin helmugaratu ziren faborito guztiak. Gaur ere egun lasaia izango dute haizerik ezean, eta tropeleko azkarrenek aukera izango dute garaipenaren lehian aritzeko.