Albistea entzun

ENBAXADA BILA

Zentrifugatzea

Vicent Partal - VilaWebeko zuzendaria

2020ko martxoak 15

Sinetsezina da koronabirusarekin Madrilen gertatzen ari dena. Gure herrialdeetan badaude fokuak, Gasteizkoa eta Igualadakoa esaterako, baina Espainiako Gobernua Madrilen onartzen ari den arduragabekeriak ez du parekorik.

Datuak aldatuz doaz minutuz minutu, baina, oro har, esan dezakegu ezen orain Madrilen, non estatuko populazio osoaren %14 bizi baita, estatu osoan COVID-19a dutenen %50 baino gehiago daudela, eta hildakoen %60 baino gehiago.

Datu estatistikoak dira, hotzak. Eta, haiek eskuan izanda, argi dago epidemia honetan Madril dela osasun arazorik larriena Espainiako Estatuan. Eta, hala eta guztiz ere, Espainiako Gobernuak sistematikoki uko egiten dio hiria ixteari, nahiz eta Italian, adibidez, Milan eta Venezia itxi egin zituzten, ehunekoak txikiagoak zirela oraindik.

Ez hori bakarrik: Madril jendea zentrifugatzen ari da kostarantz, eta inork ez du ezertxo ere egiten hori eragozteko. Valentziako gune batzuetan, La Saforren eta La Marinan adibidez, zeharo amorrarazita daude ikusita nola iristen diren trenak turistaz beteta, ezer gertatzen ariko ez balitz bezala jokatzen, abuztu bete-betean bageunde bezala.

Nola liteke hain axolagabeak izatea? Galdera hori egiten diote askok beren buruari. Gauza jakina da Madrilek estatuko gainerako tokietara zentrifugatzen dituela bere arazoak aspalditik, batez ere ekonomiari dagokionez. Barajas, adibidez, porrot hutsa da, gainerako aireportuek finantzatzen dutena, Bartzelonakoak bereziki. Baina, kasu honetan, osasunaz ari gara, herritar guzti-guztioi eragiten digun gertaera batez.

Hala ere, geure buruari galdetu behar diogu nolatan gure gobernuak ez diren ausartagoak eta nolatan ez dioten beren kabuz aurre egiten arazoari, osasun arloan dituzten eskumen esklusiboak baliatuz.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...