Albistea entzun

Osasunak geldiezin jarraitu nahi du etxetik at, Real Madrilen aurka

Eñaut Agirrebengoa -

2021eko urriak 27

Gorritxoek zapore gazi-gozoarekin bukatu zuten Sadarren Granadaren kontra jokatu zuten partida. Laugarren lehia kateatu zuten galdu gabe, eta Europako postuetan iraun zuten; alabaina, garaipenak ihes egin zien azken unean, ezusteko gol batekin. Oso bideratuta dute salbazioa, denboraldiko helburu nagusia, baina nafarrak inkonformistak dira: behin sailkapenaren goiko partera iritsita, bertan ahalik eta egonaldirik luzeena egin nahi dute. Hori horrela, anbizio handiz egingo diote gaur bisita Real Madrili (21:30, Movistar LaLiga).

Argudio indartsu bat du Osasunak baikorra izateko: etxetik at jokatu dituen lau neurketak irabazi ditu. Sadarren falta duen zorte ona topatu du Iruñetik urrun. Taldea neurketa guztietan izan da lehiakor, baina aparteko eraginkortasuna izaten ari da bisitari legez. Gaurkori begira, eredu ona izan daiteke duela bi jardunaldi Vila-realen zelaian lorturiko garaipena: zutik iraun zuen aurkaria gogor oldartu zitzaionean, eta ate aurrean ez zuen gupidarik izan.

Litekeena da gaur ere hainbat minutuz jazarria izatea, eta, horregatik, «ahalik eta hobekien defendatzen» saiatuko da Osasuna, Jagoba Arrasatek atzo adierazi zuenez. Halaber, teknikari gorritxoarentzat «funtsezkoa» izango da gol aukerak profitatzen asmatzea. Aurkariaz, gibelean uzten diren espazioak baliatzeko duen gaitasuna nabarmendu zuen: «Akabatu egiten zaituzte». Horregatik, garbi du zer saihestu behar duten: «Joan-etorrian nekez irabaziko dugu. Bestelako plan bat behar dugu». Orain arteko emaitzek «konfiantza eta autoestimua» eman ei diote taldeari, baina badaki irabazteko «partida biribila» egin beharko dutela.

Berriz ere deialditik kanpo utzi du Budimir, oraindik ez baitago sasoi betean. «Entrenamenduak behar ditu. Arazo fisikoak asko arindu zaizkio, baina onena Iruñean gelditzea da». Sasoiko daude, aldiz, beste bi aurrelariak, Chimy Avila eta Kike Garcia. Arrasatek atea irekita utzi zuen biak hasieratik jokatzeko aukerari: «Elkarrekin joka dezakete, oso bateragarriak baitira». Aridane min hartuta dago, baita Juan Perez, ordezko atezaina ere; Dario Ramosek hartuko du bere lekua.

Lehiaz kanpo, Osasunak atzo jakinarazi zuen abenduaren 19an egingo direla presidentetzarako hauteskundeak. Oraingoz, egungo lehendakari Luis Sabalzak soilik azaldu du asmoa aurkezteko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©MIGUEL ANGEL POLO / EFE

Joan Peñarroya Energia eta oldarkortasuna

Beñat Mujika Telleria

Joan Peñarroya da Baskonia eraberrituaren gidaria. Azken urteetan emaitza bikainak eskuratuta, lehenengoz arituko da Euroligako talde batean. Ostiralean egingo du debuta ligan.
 ©MIGUEL ANGLE POLO / EFE

Jaume Ponsarnau Esperientzia emango dio

Pettan Uralde

Valentzian egindako lana Bilbora ekarri nahi du orain Jaume Ponsarnau Bilbo Basketeko entrenatzaile berriak. Saskibaloi «alaia, dinamikoa eta dibertigarria» proposatzen du.
Asier Nieto, jaurtitzeko prest, joan den ostiralean, Atletico Valladoliden aurkako partidan. ©ARRATE MORALES

Sasoiko lehen erronka

Julen Etxeberria

Bidasoak Kolstad Norvegiako taldearen aurka jokatuko du gaur, Artalekun, Europako Ligako bigarren kanporaketako joanekoan

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...