Festak Beran

Dantzarako, suziriari ezin itxoin

Berako jaiak bihar dira ofizialki hastekoak, baina gaurko ere antolatu dituzte lehen ekitaldiak. Asteartera arte, erraldoiek eta musikariek hartuko dute herria, urteko egunik bizienetan.
Berako bestetan txupinazoaren ondoren, buruhandiaren aurretik lasterka.
Berako bestetan txupinazoaren ondoren, buruhandiaren aurretik lasterka. JAGOBA MANTEROLA / FOKU

Iñaki Martinez Azpiroz -

2019ko abuztuak 1
Txistularien urrutiko notak, edo kontzertuetako bateriaren soinu proba amaigabeak: jaiak direla adierazten duten hotsak dira. Beran halakoak entzuteko gogoa duenak hurbil du desira betetzeko unea: jaiak ate joka daude.

Bihar 12:00etan piztuko da jaien hasierako suziria. Gaur, baina, Beran ez dituzte jaiak geldi itxarongo. VI. Gau Krosa hasiko da 22:15ean, eta, aurretik, dantza jaialdia egingo dute. Ondoren, bost egun bete-bete. Askotariko giroak egongo dira, baina musikak ireki eta itxiko ditu egun guztiak: goizez, trikitilari edo gaiteroek; gauez, kontzertuek.

Kasualitateak alboratuta, gustu guztientzako eskaintza izanen da jaietan. Egunez, dantzak, kalejirak eta txarangak nagusituko dira; ilargipeko orduak pasatzeko lekua, berriz, txosnagunea izango da. Altzateko plazan jarri dituzte txosnak, eta musika taldeen eskaintza zabala izango da gauero: Eskean Kristo, Zopilotes Txirriaos eta El Diluvi, kasurako.

Ez dago inor jaietatik at

Lagunarteko otorduak nahiago dituenak ere badu zer aukeratu. Nabarmentzekoak dira, adibidez, igandeko bazkari feminista eta astearteko herri afaria.

Haurrak ez dira kanpoan geldituko. Erraldoi eta buruhandiak hiru egunez aterako dira, ostiralean, astelehenean eta asteartean; eta, igandean, igeriketa txapelketa egingo dute haurrek eta gazteek.

Gainera, gaueko giroaz disfrutatzeko autoa hartu nahi ez duenak baditu bidaia egiteko alternatibak. Autobus zerbitzuak antolatu dituzte Bera eta Bortzirietako gainerako herrien artean, larunbat eta igandean; bost euro da joan-etorria.

Bera esnatzear da, bihartik hasi eta asteartera arte.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Informazio osagarria