Itzalaldi analogikoa

Duela urte batzuk itzalaldi analogikoa deiturikoa heldu zen telebistara. Orduan, aparatu zaharrak egokitu edo berriak erosi behar izan genituen telebista ikusi ahal izateko. Era berean, LTD delakoaren ezarpenak hainbat tokiko kateren itxiera ekarri zuen, ezin izan baitzuten garestiegia zitzaien teknologiara egokitu. Irratiaren kasuan, ordea, uhin hertziarren bidezko emanaldi digitalak oraindik ez dira hedatu, eta Euskal Irrati Telebistak 1996ko abenduan DAB emanaldiak hasiko zituela iragarri bazuen ere, egia da gure transistore analogikoaren bidez irratia entzuten jarraitzen dugula.

Aurreko mendeko amaieran iragarritako irratiaren iraultza digitala (Kanadan eta Erresuma Batuan digitalizazioa ezartzen ari zen, eta Aznarren gobernuak espainiar multiplexen lizentziak banatu zituen), egia da FMren dial analogikoa garatzen segitu dela. Bere saturazioraino bada ere. Oraingo honetan, badirudi baietz, azkenean irrati itzalaldi digitala ere helduko zaigula Euskal Herrira. Aurtengo lehenengo seihilekoan aurreikusita dago Baionako irrati multiplexa martxan jartzea; Nafarroa Garaian, tokiko irrati digitalen 72 lizentziaren lehiaketa publikoa martxan da; eta EAEn ere irrati emanaldien ortzi muga digitala gero eta hurbilago dago.

Telebistaren kasuan gertatu zen moduan, behin digitalizaziorako iragatea burututa, oraingo transistore analogikoek ezin izango dute irrati seinalea jaso; hori ez da arazo izango 2021az geroztik Europan ekoizturiko auto-irratietan. Gure ohituretan eragin txikia izango duela esatera ausartuko nintzateke; izan ere, autoetako eta etxeetako hargailuak egokitu —edo berriak erosi— beharko baditugu ere, sakelako telefonoan edo ordenagailuan gero eta maizago entzuten ditugun emanaldietan ez dugu aldaketarik atzemango. Soinuari dagokionez ere ez dugu alde handia sumatuko, gaur egun Interneteko banda zabalerak DABek eskaintzen duen pareko kalitatea ahalbidetzen baitu.

Interneten seinalea mantendu beharko dute multiplex digitalerako iristerik izango ez duten irrati txikiek — egokitzapen teknologikoa garestiegia zaielako edo, besterik gabe, baimen administratiborik lortzen ez dutelako—. Eta duela 25 igartzen ausartu nintzen bezala, gero eta konbikzio handiagoa dut itzalaldi horrek ez duela ekarriko herrian herriko irratien ahotsen isiltzea.