Koronabirusa. Eragina ekonomian

Sukaldeetan daude orain erretegiak

Sagardotegi garaia bertan behera gelditzea kolpea izan da haragi banatzaileentzat, eta batzuek txuleten salmenta zuzenean aurkitu dute konponbidea. Sasoia guztiz salbatzea zail ikusten badute ere, txukundu ahal izango dutela uste dute.
JAGOBA MANTEROLA / ARGAZKI PRESS Tamaina handiagoan ikusi

Imanol Magro Eizmendi -

2020ko martxoak 26

Koronabirusaren krisia ostalaritza hankaz gora uzten ari den lurrikara bat izaten ari da. Tabernek eta jatetxeek itxi egin behar izan dute, eta albo-kalte larriak utziko ditu. Lurrikara horren epizentroetako bat Gipuzkoaren bihotzean egon zen; martxoaren 13an, larrialdi egoera ikusita, sagardozaleek sagardotegi sasoia bertan behera uztea erabaki zuten. Geroago etorriko zen ostalaritza jardunaren debeku orokorra, eta arazo larriak produkzio kateko katebegi guztientzat. «Larunbatez izan zen. Bezperan sagardozale batzuek jenero gutxiago eramateko esan ziguten, bezero batzuek atzera egin zutelako, eta egunean bertan jaso genituen dei gehien. Ni ere sagardotegira joatekoa nintzen, eta jabeak deitu ninduen esateko: 'Asier, itxi egingo dugu'. Hurrengo pausoa sagardozaleei saldutako jenero guztia jasotzea izan zen. Hornitzaile guztiek ez dute izan keinu hori». Asier Goikoetxea da Asier, Guikarreko langilea. Hainbat sagardotegirekin lan egiten duen haragi hornitzaile horrek.

Jenero hori txuletak dira batez ere, sagardotegi menuko gutizia, eta egun batetik bestera hozkailuak goraino beteta zituztela ikusi zuten. Dastatuz-en ere berdin zebiltzan, haiek ere guztia jaso baitzuten. «Stock guztia genuen. Guk Europa osoan banatzen dugu, eta udaberrian esnatzen da ostalaritza, baina sagardotegiak neguan bolumen hori mantentzeko aukera bat dira guretzat. Euskal Herrian dugun zortea da». Azalpena Borja Zubiaurrerena da, enpresaren kudeatzailearena. «Egoera latza» ikusita, konponbide bila hasi ziren, baita aurkitu ere: «Sagardotegietako eta erretegietako bezeroak hor jarraitzen zuela ikusi genuen, etxean, eta etxean ere gastronomiarekin gozatu nahi duela. Banaketa katea berez hautsi da, gure bezeroak erretegiak baitira, baina hau salbuespen egoera da, eta horregatik jo genuen zuzenean azken kontsumitzailearengana». Izan ere, haragi pieza handiak produktu galkorrak dira, hozkailuan luzaroan irauten duten arren.

Eta ideiak arrakasta izan du. Webgunean eskaintza eskegi, eta dei eta mezu olatu bat izan dutela azaldu du Zubiaurrek: «Ikusgarria izan da. Eskariz lepo gaude, eta Iruki beste hornitzaile batekin eskuz esku ari gara. Hasieran, Eroski, Super BM eta haien moduko banatzaileek eta hainbat harategik lagundu ziguten, gure jeneroa hartuz, eta orain gu ari gara beste hornitzaile batzuei euren produktua ateratzen laguntzen».

Guikarren pixka bat geroago hasi ziren salmenta zuzenarekin, baina egunak pasatu ahala goraka doazela esan du Goikoetxeak. «Lehen ere egiten genuen salmenta zuzen pixka bat, baina orain bi asteetan adina eskari jasotzen ari gara egun bakar batean». 25 egun inguruko ontze prozesua duten txuletak saltzen dituzte, eta hilabete baterako stock-a zuten. Garai honetan astean laurehun bat zinta saltzen dituzte, piezaren goi aldekoak, eta, bakoitzak 15-16 kilo dituela jakinda, egin kontu zenbat den. Gauzak horrela, eskaintza berezia egin dute salmenta zuzenerako: «%20ko beherapena egiten ari gara, Premium lerroari izan ezik. Guk kalitate oso handiko produktua dugu, behi zaharrarena baino ez, eta irabazi tartea txikia da». Erritmo onean ari dira, baina ez du uste sasoia erabat salbatuko dutenik. «Makillatzeko balioko digu. Galerak izango ditugu, baina murriztu ahal izango ditugu».

Baikorragoa da Zubiaurre. «Pentsa, aldi baterako lan espedientea bertan behera utzi dugu. Harro gaude horrelako neurri bat hartu izanaz. Gutxienez bizpahiru asterako lana dugu». Lana, halere, zailagoa da orain; banakako eskaerak profesionalenak baino txikiagoak dira, eta koronabirusak osasun neurriak zorroztu ditu: «Zatiketa areto berriak ireki ditugu, metro eta erdiko aldea errespetatzeko. Prozesua motelagoa da, baina egokitu beharra dago; osasuna da lehentasuna».

Bada uko egin dionik

Banatzaile guztiak, dena den, ez dira iritzi berekoak. Txogitxuko arduradun da Imanol Jaka, eta haiek ez dute salmenta zuzenik egin. «Une dramatikoa da; itxialdian gaude, eta ez dakit eskaintzekin hastea den bidea». Beste tankera bateko konponbideak eskatu ditu.«Sagardotegiak gure salmenta bolumenaren %0,5 dira, edozein zatiketa aretok duen arazo txikienetakoa. Salmenta zuzenarekin ezer gutxi konponduko dugu. Sektoreak beste erabaki batzuk behar ditu: aldi baterako txostenak erraztu, kobratze karterarekin lagundu... Gure sektorea garrantzitsua da Euskal Herrian, eta erakundeek erreakzionatu egin behar dute, eta hala egingo dutela espero dut».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Ordiziako herritar batzuk maskarak jantzita, atzo. ©JAVIER ETXEZARRETA / EFE

Agerraldiak ugaritu egin dira

Irati Urdalleta Lete, Iosu Alberdi Igor Susaeta

Beste bi foku agertu dira Nafarroan: Tuterakoan 23 pertsonak eman dute positibo, eta Iruñekoan, bostek. Ordiziakoan 58 dira kutsatutakoak; Murgarentzat, ez dago konfinamendua ezartzeko beharrik

 ©JON URBE / FOKU

Maskara, paisaiaren parte, era orokortuan ez bada ere

Arantxa Iraola - Amaia Ramirez de Okariz Kortabarria - Edurne Begiristain -Olatz Silva

Birusak hedatzen segitzen duela erakutsi dute azken egunotako datuek; izurriari euste aldera, beraz, maskararen erabileraren aldeko ahotsak ozentzen ari dira. Ez da uniformea erabilera. Errenterian, Hendaian eta Urruñan, Gasteizen eta Barakaldon izan da BERRIA erabilera aztertzeko.

Bi erizain, Galdakaoko ospitalean (Bizkaia) maiatzaren 6an, 55 egun gaixorik zeramatzan gizon bat sendatu zela ospatzen. ©ANDONI LUBAKI / FOKU

Koronabirusaren lehen kolpea Euskal Herrian: 2.152 hildako lau hilabetean

Mikel P. Ansa

Martxoaren 1etik ekainaren 30era, lau hilabete. Neguaren azken hondarra, eta udaberri guztia. Koronabirusaren pandemiak hankaz gora jarri du Euskal Herria, eta bizimoduak astindu ditu. Pandemiaren lehen olatuaren balantzea egin du BERRIAk, hamazazpi grafiko eta hamazazpi galdera hauekin.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna