Albistea entzun

Gidabaimena ateratzeko garaia

Autoeskolek udan izaten dute mugimendurik handiena. Pandemiak aldaketa batzuk eragin dituen arren, sektoreko langileak eta ikasleak lanez lepo dabiltza hilabeteotan.
Ikasleak gidabaimeneko azterketa teorikoa prestatzen, maskara jantzita eta distantziak mantenduz.
Ikasleak gidabaimeneko azterketa teorikoa prestatzen, maskara jantzita eta distantziak mantenduz. GORKA RUBIO / FOKU Tamaina handiagoan ikusi

Aitor Garmendia Etxeberria -

2021eko uztailak 22

Autoeskoletan ohi baino mugimendu handiagoa igartzen da. Uda da sektoreak lan gehien izaten duen sasoia. Ekaina eta uztaila, batez ere, abuztuan ez baitute azterketarik antolatzen Hego Euskal Herrian. Iaz, salbuespena izan zen. Konfinamenduaren ostean, Espainiako Trafiko Zuzendaritzak azterketak antolatu zituen abuztuan. Aurten, normaltasunera itzuliko dira.

«Presiopean» dabiltza ikasle asko, Gorka Agirrezabala Zumaia autoeskolako (Gipuzkoa) arduradunaren ustez. «Abuztuaren 2an egin ahal izango dute azken azterketa teorikoa; praktikoa, berriz, 10ean. Gainontzean, irailera arte itxaron beharko dute», azaldu du.

Unibertsitate edo eskoletako azterketak amaituta, gazte ugarik autoeskolan izena eman dute. Gehienek abuztuko oporraldiaren aurretik gainditu nahi dute, gutxienez, teorikoa. Julen Zabalua da horietako bat. Uda honetan hasi da azterketa teorikorako klaseak hartzen, Beasainen (Gipuzkoa). «Eskola amaituta, denbora libre gehiago nuenez, gidabaimena ateratzeko aprobetxatzea pentsatu nuen», adierazi du.

Itxaron zerrendak

Azterketa praktikoekin dagoen arazoa azaldu du Agirrezabalak: «Aztertzaileak gutxitu dituzte: batzuk erretiratu egin dira, eta horien partez ez dituzte berriak jarri». Trafiko Zuzendaritzak gehiago jarriko dituela agintzen dien arren, Agirrezabalaren ustez egoerak ez du hobera egiten. Horregatik, itxaron zerrenda luzeak sortu dira.

Alaitz Aguadok , beraz, zain egon beharko du: «Esan didatenez, itxaron zerrenda luzeak daude. Azterketarako data eskatu beharko nuke...». Iazko uztailean hasi zen teorikoarekin, eta abenduan atera zuen. Orain, praktikorako prestatzen dabil, Errenterian (Gipuzkoa), baina oraindik ez du eskatu azterketarako eguna.

Aurten, teorikoa prestatzen ari diren batzuek ere itxaron egin beharko dute. Pandemia dela eta azterketa teorikoetako edukierak murriztu dituztela adierazi du Zumaia autoeskolako arduradunak. Autoeskolek ere hartu dituzte pandemiari aurre egiteko ohiko neurriak. Halere, Agirrezabalaren arabera, ez dute «askorik aldatu» lan egiteko modua.

COVIDak planak aldarazi dizkio Zabaluari.Uztailaren 14an azterketa teorikoa egitekoa zen, baina atzeratu egin behar izan du: «Azterketa baino bi egun lehenago, konfinatuta egon behar nuela esan zidaten, lagun batek positibo eman zuelako. Ezin izan nintzen azterketara aurkeztu». Azkenean, gaur egingo du azterketa.

Hego Euskal Herriko ikasle gehienek gazteleraz egiten dituzte azterketak, euskaraz egiteko aukera badagoen arren. Aguado joan zen autoeskolak ez zuen ematen euskaraz egiteko aukerarik. Zabaluarenak, aldiz, bai, baina gehiengoak bezala, berak ere gazteleraz egingo du.

Zumaia autoeskolak euskarazko azterketen alde lan handia egin zuela jakinarazi du Agirrezabalak: «Gipuzkoan euskarazko azterketak hasi zirenean, jende gehien aurkezten zuen autoeskola ginen». Azalpenak euskaraz ematen jarraitzen dute, baina azken urteetan ikasle oso gutxi aurkezten dituzte euskarazko azterketetara: «Ikasleak oso atsekabetuta irteten ziren azterketatik, galderak gaizki euskaratuak daudelako. Konfiantza galdu dugu».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Gasteizko Txosna Batzordeak gaur eginiko agerraldia. ©Raul Bogajo / FOKU

Gasteizko txosnek dei egin dute abuztuaren 5ean kaleak hartzeko

Amaia Ramirez de Okariz Kortabarria

Kolektiboek jakinarazi dutenez, lehentasuna «krisi egoerari modu kolektiboan» aurre egitea da, guztien «osasuna eta zaintza ezinbestekoak» baitira. Halere, argi dute Gasteizko Txosnak «behar bat» direla; beraz, egun osoko egitaraua antolatu dute abuztuaren 5erako.

 ©JON URBE / FOKU

«Musikak lanbidea eta herriaren nortasuna ematen die moxostarrei»

Ane Markina Auzmendi

Toño Puerta Taupadak GKEko kide eta San Ignacio de Moxoseko Musika Eskolako zuzendari artistikoa da, eta eskola hartakoen zazpigarren diskoa aurkeztu du: 'Majara´iwa-Resplandor'.
Lau herritar Aizkolegi ibilbidean, Bertizen (Nafarroa). ©IÑIGO URIZ / FOKU

Natura ukitzeko bidea

Olaia L. Garaialde

Zortzi ibilaldi egin daitezke Bertizko oihanean. Horrez gain, Lorategi Historikoa egunero bisitatu daiteke; ehun urte baino gehiago ditu

Gorobel mendilerroan hasi, eta Hiru Erregeen Mahaian amaituko da Urmuga. Hemeretzi egunez, 380 kilometroko mendi zeharkaldia egingo dute. ©URMUGA

Urmuga 2021 artikulu bilduma

Berria

Egitasmoak mendia eta musika uztartuko ditu bigarrenez. Uztailaren 13tik 31ra arte, ibilbideak Euskal Herri osoa zeharkatuko du, 19 etapatan. BERRIAk egunero argitaratuko ditu Urmugarekin lotutako iritzi artikuluak.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.