UEFAk espedientea ireki dio Osasunari, Nafarroako klubak erakunde horren diziplina arauak urratu dituelakoan.Auzitegi Gorenak ebatzitakoa hartu du kontuan Osasunari espedientea irekitzeko. Auzitegi Gorenak urtarrilean frogatutzat eman zuen Iruñeko taldeak 2013-2014ko denboraldiko Espainiako Lehen Mailako bi partidaren emaitzak adostu zituela.
Ligako 37. eta 38. jardunaldietakoak dira bi partida horiek: lehena, Betisek eta Valladolidek Sevillan (Espainia) jokatu zutena; eta, bigarrena, Osasunak eta Betisek Sadarren jokatu zutena. Auzitegi Gorenaren arabera, Osasunako presidenteak, bi agintarik eta kudeatzaileak akordioa egin zuten Betiseko zenbait jokalarirekin, Espainiako taldeak bi partida horiek gal zitzan. Hori eginda, Osasunak aukera gehiago izango zuen mailari eusteko.
UEFAren inspektore batek aztertuko du orain Auzitegi Gorenaren ebazpenak zer ondorio izan ditzakeen Europako lehiaketetan. Osasunak zehaztu duenez, oraindik ez du espedientearen berririk. Hala ere, litekeena da aurki jasotzea.
Zigortuko balute, Iruñeko taldeak ez luke jokatuko Konferentzia liga datorren sasoian, eta Espainiako Ligako zortzigarren sailkatuarentzat izango litzateke lekua, Athleticentzat.
UEFAk espedientea ireki dio Osasunari arau urraketagatik
Iruzkinak
Ez dago iruzkinik
Ordenatu
