Albistea entzun

Ezustean harrapatu dituzte berriz

Elisa Balsamok irabazi du urrezko domina errepideko proban Flandriako Munduko Txapelketan. Ane Santesteban 39. izan da
Elisa Balsamo italiarra, urrezko dominarekin.
Elisa Balsamo italiarra, urrezko dominarekin. JULIEN WARNAND / EFE Tamaina handiagoan ikusi

Ainara Arratibel Gascon -

2021eko irailak 26

Emakumezkoen txirrindularitzan Herbehereak da herrialderik indartsuena. Marianne Vosek, Anna van der Breggenek eta Annemiek Van Vleutenek urteak daramatzate UCIko egutegiko proba nagusiak menderatzen beren taldeekin. Selekzioarekin batzen zirenean are agerikoagoa zen haien nagusitasuna. Baina Tokioko Olinpiar Jokoetan, errepideko proban, ihes egin zien urrezko dominak. Anna Kiesenhofer austriarrak ezustean irabazi zuen. Atzo, Flandriako Munduko Txapelketan, antzeko zerbait gertatu zitzaien. Elisa Balsamo italiarrak irabazi zuen. Zilarra Vosentzat izan zen, eta brontzea Kasia Niewiadomarentzat (Polonia). Hiru euskal txirrindulari aritu ziren lehian. 39. izan zen Ane Santesteban, 56. Eider Merino eta 78. Lourdes Oiarbide.

Erritmo handiko lasterketa izan zen. Zale ugari bildu zen errepide bazterrean, eta aspaldiko partez txirrindulariek haien berotasuna jaso ahal izan zuten. Helmugan Balsamok eta Vosek negarrez amaitu zuten. Baina arrazoi ezberdinengatik. Balsamok garaipenaren loria dastatu zuen; Vosek, berriz, ezin izan zuen laugarren urrezko domina eskuratu Munduko Txapelketa batean, eta arantza hori geratu zitzaion atzokoan. Gainera, Van der Breggen herrikideari eskaini nahi zion garaipena, erretiroa hartu baitu. Ez zen posible izan. Amorruaren malkoak ere izan ziren, Herbehereetako txirrindulariek lan oso ona egin baitzuten, baina ez zuten jakin biribiltzen.

Eraso ugari izan ziren lehen kilometroetatik. Selekzio ugarik oldarkor jardun zuten. Baina lasterketa helmugara iristeko 30 kilometro falta zirenean hasi zen benetan mugitzen. Aude Biannic frantziarrak aurrera jo zuen, eta ondoren Marlen Reusser suitzarrak eta Mavi Garcia kataluniarrak. Van Vleuten saiatu zen tropela atzean utzi, eta haiek harrapatzen. Baina faboritoetako bat izanda, beste selekzioak ez zioten utzi. Helmugarako 16 kilometro falta ziren, zirkuituari azken itzulia ematea falta zitzaien txirrindulariei, eta jada ihesean zeudenenen errenta oso txikia zen. 10 kilometro falta zirenean harrapatu zituzten. Multzoa batuta zegoen. Herbehereetako selekzioak kontrolpean zuen lasterketa. Baina Jokoetan ez bezala, oraingo honetan nahiago izan zuten erasokor aritu. Batez ere Ellen van Dijk izan zen gehien ahalegindu zena, baina baita ere Van Vleuten bera ere. Alferrik, ordea.

Sei kilometro baino ez ziren geratzen, eta bost txirrindulariz osatutako multzoak aurrera egin zuen. Baina haien saiakera ere kamutsa izan zen. Dena prest zegoen esprinterako. Bazirudien Vosek irabaziko zuela. Baina Balsamok aurrea hartu zion. Denbora berdinean sartu ziren helmugara, eta segundo batera esprintean sartu ziren beste txirrindulariak.

Junior mailako gizonezkoen errepideko proba ere atzo jokatu zen. Per Strand norvegiarrak kolkoratu zuen urrea, Romaine Gregoire frantziarrak zilarra eta Madis Mihkels estoniarrak brontzea.

Gaur, gizonen errepidekoa

Flandriako Munduko Txapelketak gaur amaituko dira, gizonezkoen errepideko probarekin. Hiru euskal herritar izango dira irteeran: Alex Aranburu, Imanol Erbiti eta Gorka Izagirre. Aranburu da aukera gehien dituen aurrean sartzeko. Baina oso zaila izango du, bertan izango baitira, besteak beste, Primoz Roglic, Julian Alaphilipp, Wout van Aert, Tadej Pogacar eta Sonny Colbrelli.

Klasiko baten itxura du ibilbideak, hormaz eta harbidez jositako errepideetatik joatera behatuko ditu txirrindulariak. Guztira 268 kilometro izango dira egin beharko dituztenak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Oinatz Bengoetxea Leitzan (Nafarroa), pasa den urrian. ©Idoia Zabaleta / Foku

Oinatz Bengoetxeak pilota profesionala utziko du

Paulo Ostolaza

Baikok iragarri duenez, Iruñean jokatuko du bere azken neurketa urtarrilaren 29an. Ordura arte agurreko lau partida jokatuko ditu. Hemeretzi urte egin ditu profesionaletan.

Athletic argitasunik gabe beste behin

Athletic argitasunik gabe beste behin

Ainara Arratibel Gascon

Zuri-gorriek 0-0 berdindu dute Getafaren zelaian. Lehen zatian jokoaren ekimena izan dute, baina argitasuna falta izan zaie. Bigarren zati kaskarra jokatu dute, ordea. Zazpi jardunaldi daramatzate irabazi gabe.

 ©ARITZ LOIOLA / FOKU

«Txapeldun izateak azken lasterketako arantza ateratzeko balio izan dit»

Unai Ugartemendia

Bi aste besterik ez da igaro Sandra Sevillanok International Skyruning Federationeko Europako Ultra Txapelketa irabazi zuenetik. Portugalgo Pisao Extreme lasterketan izan zen.
 ©BERRIA

Aurrera egiten baino ez daki

Julen Etxeberria

Udan iritsi zen Garziandia Hungariara, Pick Szegedera. «Oso gustura» ari da, eta hura eta taldea oso ondo ari dira: lider dira ligan, eta lehia bete-betean daude Txapeldunen Ligako final-laurdenetarako sailkatzeko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.