Albistea entzun

Kokapen onaren bila

Realak eta Osasunak sasoi hasiera onari eutsi nahi diote. Txuri-urdinak Cadizen zelaian ariko dira; gorritxoek Valentzia jasoko dute Sadarren
Osasunako jokalariak gola ospatzen, Cadizen aurkako partidan.
Osasunako jokalariak gola ospatzen, Cadizen aurkako partidan. ROMAN RIOS / EFE Tamaina handiagoan ikusi

Jon Ander De la Hoz -

2021eko irailak 12

Realak partida ugari ditu datozen egunetan. Gaur Cadizen zelaian hasiko du norgehiagoken aldi jarraitua (18:30, Movistar). Espainiako ligako eta Europa ligako neurketak kontuan hartuta, zazpi aldiz jokatuko du datozen 22 egunetan. Bi txapelketetan hasiera on bat osatu eta udazkenari kokapen onean ekiteko baliatu nahi dute txuri-urdinek.

Realak egutegi exijentea du epe laburrean, baina Imanol Alguacil prestatzaileak ez du gaurko neurketaz harago begiratzen: «Bestela, nahastu egingo gara. Egin behar duguna da Cadizen aurkakoa ondo prestatu, eta hura irabazi. Hurrengoak? Etorriko dira gero».

Ligako laugarren jardunaldia da gaurkoa, eta orain artean jokatutako hiru partidetatik bi irabazita, gorengo postuetan indartuko duten hiru puntu eskuratu nahi ditu Realak. Cadizek, berriz, ez du partidarik irabazi, eta bi puntu soilik ditu. Egokitzapen prozesu betean dagoela esan du Imanolek: «Orain arte 4-4-2 eskeman aritzen ziren, eta aurten 4-5-1 erabiltzen ari dira, eta erasoko arloan 4-3-3a, hegalekoen sakontasuna baliatuz. Gauzak aldatzen ari dira, eta goian estutzeko aukera badute, egingo dute».

Cadizen etxean aritzeko jokalari gehientsuenak prest ditu teknikari oriotarrak. Baita Alexander Isak ere; aurrelari suediarra ur aparretan ibili da bere selekzioarekin, eta, herenegun atseden hartu bazuen ere, «jokatzeko moduan» izango dela dio Imanolek. Realak bi gol sartu ditu azken jardunaldietan. Imanolek ez du presarik, ordea. Azpimarratu du «iaz ere, golak eskatzen» aritu zela sasoi hasieran, eta berandu baino lehen ailegatu zirela.

Dena den, prestatzaileak ohartarazi du aurkaria atzean indartsu aritzen den taldea dela. Cadizek baditu gabezia batzuk. Jon Ander Garrido getxoztarrak ez du jokatuko, eta ikusteko dago Jose Marik eta Alberto Pereak egingo duten: «Haien taldea aztertu dugu, jokatu dituzten partidak ere bai, eta, hamaikakoa jakin gabe asmatzea zaila den arren, argi dago Alvaro Cerveraren taldeari aukerak sortzea zaila dela. Azken partidan gertatu zitzaiena ez da ohikoa». Ordukoan, azken lau minutuetan bi gol sartu zizkion Osasunak, eta partida irauli egin zuen.

Onbidean segitzea xede

Hain justu, Cadizen aurkako garaipenak hauspotuta ariko da Osasuna. Sasoi hasiera egokia biribiltzeko asmoz ariko da Jagoba Arrasateren taldea, eta, gainera, zaleen bultzada handiagoa izango du. Estadioaren %60 betetzeko baimena du Osasunak: 14.000 jarraitzaile izango dira Sadarren.

Haien bultzada baliatu nahi dute Valentzia menderatzeko (16:15, Movistar). Elkarren aurka Iruñean jokatu dituzten azken lau partidetatik bi berdindu egin dituzte, eta azken biak Osasunak irabazi ditu. Halaxe segitu nahi du Jagoba Arrasatek: «Uste dut taldeak egindako liga hasiera itxaropentsua dela, eta horri jarraipena eman nahi diogu. Valentzia oso aurkari indartsua da, baina talde handi hauen mailan egon gaitezkeela erakutsi nahi dugu».

Osasunak ondo ekin dio ligari. Jokatu dituen hiru partidetan garaipen bat eta bi berdinketa lotu ditu. Lehendabiziko jardunaldietan ate aurrean arriskua sortu du, baina Arrasatek iritzi du eraginkorragoak izan behar dutela: «Taldea baloia edukitzeko gai izan da, eta aukerak sortu ditu. Eraginkortasunean hobetu behar dugu».

Arrasatek jokatzeko moduan edukiko du taldearen zatirik handiena. Ante Budimirrek gainditu ditu arazo fisikoak, eta deialdian sartu du Berriatuko entrenatzaileak. Okerrik ezean, ordea, Kike Garciaren aldeko hautua egingo du Osasunako prestatzaileak. Kike Barja da gorritxoen hutsune bakarra; hegalekoak osatze bidean segitzen du. Valentziak, berriz, beren selekzioekin aritu diren zenbait jokalari falta izan ditu aste barruan, eta ikusteko dago Jose Bordalasek zelairatuko dituen ala atseden emango dien.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©Osasuna

Karolina Sarasua iraindu eta mehatxatu zuten gazteak identifikatu ditu Poliziak

Berria

Adin txikikoak dira guztiak, eta, beraz, Adin Txikikoen Fiskaltzaren eskuetan gelditu da jazoerari buruzko ikerketa.

Fernando Llorente, Eibarreki azterketa medikua pasatzen. ©SD EIBAR

Fernando Llorentek Eibarren jokatuko du

Julen Etxeberria

36 urteko aurrelaria talderik gabe zegoen, eta denboraldia amaitu arteko kontratua adostu du eibartarrekin. 

Rodrigo Salinas Bidasoako jokalaria, jaurtitzen, atzo. ©GORKA RUBIO / FOKU

Bidasoak lehen garaipena lortu du Europako Ligan

Berria

Irundarrek lehen zatian eginiko lanari esker irabazi diote Pfadi, Artalekun, ligaxkako bigarren jardunaldian: 32-28

Alaveseko jokalariak, partidako gol bakarra ospatzen, Mamadou Loumek sartutakoa. ©DAVID AGUILAR / EFE

Arnasaldi sakona

Eñaut Agirrebengoa

Alavesek bigarren garaipena kateatu du, Elxen aurka, Loumen gol bati esker. Jaitsieratik irten da behin-behinean

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.