Bozetan «baldintza beretan» parte hartzeko, aske uzteko eskatu dute kontseilariek

«Negoziazioaren» bideak ibiltzea agindu dio Junquerasek Gorenari. Catalunya En Comuk argitu du ez daudela gobernuan «inor jartzeko»

Igor Susaeta -

2017ko azaroak 29

Auzitegi Gorenak bere gain hartu zuen, joan den ostiralean, Auzitegi Nazionalak kartzelatutako Generalitateko kideen kontrako prozesu judiziala. Beraz, Pablo Llarena Goreneko epailearen aurrean deklaratu asmo dute kontseilariek. Aurretik, baina, horien abokatuek idatzi bat helarazi diote magistratuari, ikertuei jarritako kautela neurriak berrikus ditzala eskatzeko. Andreu Van den Eynde ERCko Oriol Junqueras, Raul Romeva, Dolors Bassa eta Carles Mundoren abokatuak arrazoitu du ez dagoela ihes egiteko arriskurik, laurak hautagaiak izango direlako abenduko bozetan. Argudiatu du, gainera, ezingo dituztela Carmen Lamela Auzitegi Nazionaleko epaileak egotzitako delituak berriz egin —sedizioa, matxinada eta diru publikoaren erabilera okerra—, jada teknikoki ez direlako kontseilariak. Hautagai diren neurrian, eta jardun politikorako «eskubidea» dutenez, iruditzen zaie gainontzeko hautagaien «baldintza beretan» parte hartu beharko luketela bozetan, eta ez espetxean egonda.

Kautela neurriak berrikusi ditzala eskatu du, era berean, Jordi Turull eta Josep Rull kontseilarien (PDECat) eta Jordi Sanchez ANC Biltzar Nazional Katalaneko presidentearen defentsak. Jordi Pina da haien abokatua, eta Van den Eyndek erabilitako argudioei heldu die hark ere. Turull, Rull eta Sanchez Junts Per Catalunyaren zerrendako hautagaiak dira.

Llarenak jaso ditu idatziak, baina ez dago eperik zehaztuta horiei erantzuteko. Deklaratzera deitu ditzake edo idatziz erantzun, kontseilariak galdekatu gabe. Bestalde, Auzitegi Nazionalak jakinarazi du astelehenean ebatziko duela kontseilariek jarritako apelazio helegiteei buruz. Kausa jadanik Gorenaren esku dagoen arren, Auzitegi Nazionalak epai bat eman beharra dauka, betiere defentsek helegite horiei uko egitea erabakitzen ez badute. Litekeena da hala gertatzea. Sanchezek eta Jordi Cuixart Omnium Culturaleko presidenteak jarritako apelazio helegiteak atzera bota zituen Llarenak, eta espetxean jarraitzen dute.

ERCko lau kontseilari ere kartzelan daude. Iragan astean Auzitegi Nazionalari helarazitako idatzian ametitu zituzten Espainiako Konstituzioaren 155. artikuluaren ezarpenaren ondorioak. Gorenari bidalitakoan gauza bera egin dute, eta gehitu ametitzen dutela, nahiz eta ados ez egon, «ez judizialki eta ezta politikoki ere». Kontseilariek agindu dute «negoziazioaren eta elkarrizketaren» bideak ibiliko dituztela, «akordio bat lortzeko ahaleginean».

Bestalde, Marta Rovira ERCko idazkari nagusiak ere nabarmendu zuen, atzo, hautagai guztiek ez dutela «baldintza beretan» parte hartuko bozetan.

«Filosofiaren adibide»

Kataluniako Parlamentuko Mahaiko kideak bermea ordainduta aske utzi zituen Gorenak —kontseilariei egozten dizkieten delitu berak leporatzen dizkiete—, eta Van den Eyndek idatzian dio «proportzionaltasun juridikoak eduki beharreko filosofiaren adibide» dela epai hori.

Bestalde, Catalunya En Comuko hautagai Xavier Domenechek atzo argitu zuen ez daudela «gobernuan inor jartzeko».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Bi erizain, Galdakaoko ospitalean (Bizkaia) maiatzaren 6an, 55 egun gaixorik zeramatzan gizon bat sendatu zela ospatzen. ©ANDONI LUBAKI / FOKU

Koronabirusaren lehen kolpea Euskal Herrian: 2.152 hildako lau hilabetean

Mikel P. Ansa

Martxoaren 1etik ekainaren 30era, lau hilabete. Neguaren azken hondarra, eta udaberri guztia. Koronabirusaren pandemiak hankaz gora jarri du Euskal Herria, eta bizimoduak astindu ditu. Pandemiaren lehen olatuaren balantzea egin du BERRIAk, hamazazpi grafiko eta hamazazpi galdera hauekin.

Osasun langile bat pertsona bati PCR proba egiten, herenegun, Ordizian. ©Jon Urbe / Foku

58 dira Ordiziako agerraldiarekin lotutako kasuak

Iosu Alberdi - Irati Urdalleta Lete

Positibo emandakoek ezingo dute bozkatu Ordizian. Bai, ordea, haien kontaktu zuzenek. Araban beste foku bat izan den ikertzen ari da Osasun Saila, azken orduetan bederatzi kasu atzeman ostean.

Nafarroako Gobernuko Osasun kontseilari Santos Indurain. ©Jesus Diges / Efe

23 positibo detektatu dituzte Tuterako agerraldian

Igor Susaeta

Beste agerraldi bat gertatu da Iruñean, eta bost pertsona kutsatuta daudela baieztatu dute

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna