Itzulera ona izan du

Hilabete eta erdiko etenaren ostean, atzo itzuli zen lehiara Athletic, eta ez edonola. Intentsitatez eta erritmoz jositako partida bat jokatu zuen Betisen zelaian, eta merezitako puntua poltsikoratu zuen. Sailkapenaren goiko postuetan egonik, onenen artean mantentzeko derrigorrezkoa zuen gutxienez punturen bat lortzea, eta ez zuen huts egin. Betisen plaza hain gaiztoa izanik, hasi eta buka oso ongi lehiatu zen, eta, amaieran, irabazteko aukera bat edo beste ere izan zuen. Gol aukerak sortzea dezente kostatu zitzaion, baina ez zuen minutu bakar batean ere kontzentrazioa galdu. Hau da, aurreko sasoietan galdu ohi zituen partida horietako batean, gutxienez puntu bat lortu zuen.

Hasierako hamaikakoan bizpahiru ezusteko zelairatu zituen Ernesto Valverdek, Iñigo Martinez, Muniain eta Berenguer aulkian geratu baitziren. Williams anaiak hegaletan eta Guruzeta aurrelari ipinita, abiadura lortzen saiatu zen entrenatzailea. Oreka, dena den, zelai erdiak eman zien zuri-gorriei. Dani Garciaren lana aipagarria izan zen, Betisen erasoko jokoa bertan behera utzi baitzuen. Oso lehiatua izan zen lehen zatia, baina etxekoek behetik gora egin zuten pixkanaka, eta, kalitatea lagun, agindu egin zuten gehienean. Fekirren oinetatik irten ziren aukerarik arriskutsuenak, baina Unai Simon dotore aritu zen atepean.

Bigarren zatiak ere lehengo lepotik izan zuen burua. Berdintasun horretan, erosoago zegoen Betis, eta Valverdek aldaketak egin zituen: Muniain, Raul Garcia eta Berenguer zelairatu zituen 70. minutuan. Aldaketek arnasa eman zioten taldeari, eta, Muniainen gidaritzapean, Betisen areara gehiago iristen hasi ziren zuri-gorriak. Yurik eta Nico Williamsek erasoko jokaldi apartak osatu zituzten, baina inork ez zuen asmatu azken errematean. Betis jokalari bat gutxiagorekin geratu zen azken minutuetan, baina Athleticek ez zuen abantaila baliatu. Dena den, puntuari esker, aurkari zuzen batek sailkapenean gaina ez hartzea lortu zuen.