Noiz sortua: 2018-05-29 00:30:00

SASKI DA!

Ledesmako amateurrak

Danel Agirre -

2018ko maiatzak 29

Exorzizatu beharreko bat. Epaitegietan eta akziodunen batzarretan erregistratutako sikofonia pare bat salbu, Bilbo Basketen egunerokoa horrenbeste baldintzatu duen mamuak isilik eman ditu lau urte. Taldeak maila galtzea nahikoa izan da, Gorka Arrindak El Correo egunkariari elkarrizketa oportunista askoa eskaintzeko. Epelak esan dizkie bera ordezkatu zuten enpresariei: «Kluba Ledesman poteak hartuz kudeatzen duten zale amateurrak» baino ez dira zuzendaritzako kideak, akziodun nagusi ohiaren aburuz. Bilbo Basket maneiatzen eman zuen aroa zuritzeko baliatzen du Arrindak solasaldia, itzulipurdi dialektiko bat bestearekin kateatuta. Klubak bere enpresei kontratatzen zizkien —eta oraindik ordaintzen dabilen— zerbitzuak ez lirateke bere patrikak modu ezin itsusiagoan betetzeko trikimailua, baizik eta Bilbo Basketek langile gehiago soldatapean eduki beharra ekiditeko metodo burutsua. Erakunde publikoak (Eusko Alderdi Jeltzalea, «onenak») koipeztatuz bukatzen du Arrindak elkarrizketa. Batek daki zein helbururekin. Joan den ostiralean Bizkaiko Hitza-n argitaratu analisi zorrotzean, etorkizunari itxaropentsu egin zion so Beñat Zarrabeitia kazetariak, Bilbon eta eskualdean saskibaloiak badituenez sobera tradizio eta masa kritiko nabarmenduz. Bilbo Basket salbatu edo egitasmo berri bati sinesgarritasunez ekiteko, hori bai, ezinbestekoa da B serieko filma batetik ateratakoak diruditen Arrindaren moduko mamuak behingoz exorzizatzea.

Bost pezetako ideia. ACBk presidente berria aukeratu behar zuen joan den asteartean. Javier Imbroda Espainiako hautatzaile ohiaren eta Miguel Juaneren hautagaitzak baztertu egin zituzten klubek. Juan Francisco Garcia enpresariarena korrika eta presaka erretiratu zen, bozketa baino ordu batzuk lehenago atxilotu zutelako, Eduardo Zaplana Espainiako Lan ministro ohiaren aurkako operazioan. ACBk presidenterik gabe jarraitzen badu ez da aurre egin beharrekoen zerrenda ziztrina delako, preseski. Gobernu eza egundokoa da aspalditik, eta lehiaketaren osasunari eragiten dio. Konpontzekoen artean ez da akaso presazkoena, baina egutegiaren egituraketak merezi du gogoeta sakona. ACBko kanporaketak asteburuan hasi dira, behin Euroligako lauko pasatuta, eta NBAk hilabete eta erdi daramalarik kanporaketetan murgildurik. Zaleak tentsio askorik gabe iritsi ohi dira urte sasoi honetara, aisialdia eraikin itxi sargorietan igarotzeko gogo gutxirekin. Jokalariei ere oso luze egiten zaie denboraldia, eta nekeari beste eragozpen bat gehitzen zaio. Asteak dira merkatua esnatzen hasi zela. Agenteak sakelakoak astintzen hasi ahala, profesional askoren grinak eta arretak beherantz egiten dute nabarmen. Idatzitakoaren ondorio praktikoa dira igandeko Baskoniaren eta Unicajaren artekoa bezalako saskibaloi partida oso kaskarrak. Saski Da!-ren bost pezetako konponbidea: ACBren sasoi erregularra apirila erdialderako bukatu; ondoren, Euroligako final-laurdenak tartekatu; maiatzean ligako kanporaketekin jarraitu; eta, lauko finala Europako denboraldiko benetako azken festa bihurtzea.

Sudurrean pintza, berriz. Ezjakin konpletoa dela disimulatu, eta zutabe hau idatzi ahal izateko, Whatsapp-en hainbat sanedrin ditu Saski Da!-k, saskibaloiaz benetan dakiten adiskide eskuzabalekin. Horietako batek, Enekok, mezu laburra bidali zion zapatuko ordu txikitan, Boston Celtics eta Cleveland Cavaliersenen arteko Ekialdeko konferentziako finaleko seigarrena bukatu berritan: «LeFroome James». Txantxa dirudien hitzokei inprobisatuari ez zaio mamirik falta. Italiako Giroa irabazi berri duen txirrindulariaren kasuan bezala, sudurrean pintza ipini beharra dago, Cavseko izarraren erakustaldiez gozatu eta botika kiratsa uxatzeko. Ohikoa da James bezala NBAn hamabost urte daramatzaten beteranoek odol kontrolik ez pasatzea. Pasaporte biologikoa ezartzetik oso urrun da liga. 3.720 minutu jokatu ditu dagoeneko Jamesek denboraldi hasieratik, ligako bigarrenak baino 444 gehiago. 33 urterekin.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Osakidetzako langile bat Txagorritxuko laborategi batean lanean. ©Gorka Rubio, Foku

Justizia Auzitegi Nagusiak ebatzi du Osakidetzak arriskuan jarri dituela langileak

Ainhoa Larretxea Agirre - Mikel P. Ansa

Osagileen sindikatuek jarri zuten salaketa, eta ekainaren 16an egin zuten epaiketa. ESK sindikatuak Nekane Murga Osasun sailburuaren eta Osakidetzako zuzendaritzaren dimisioa eskatu du. Osakidetzak, ordea, «positibotzat» jo du ebazpena, epaileak atzera bota dituelako sindikatuen «eskari gehienak».

Jendea paseoan, konfinamendua arintzeko lehen fasean. ©JON URBE/ FOKU

Jaurlaritzak ziurtatu du COVID-19aren agerraldiak «kontrolatuta» daudela

Irati Urdalleta Lete

Beste hamalau positibo eta hiru hildako daude. Jaurlaritzak pentsatu du neurriak areagotuko dituela jende pilaketak «mantenduz eta orokortuz» gero

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna