Noiz sortua: 2018-08-07 00:30:00

Andre Maria Zuriaren jaiak

Gazteek egina eta gazteei zuzendua

Gasteizko txosnagunean dago Gazte Karpa: espazio horrek sei urte beteko ditu aurten. Hiriko gazteen arteko harremanak indartzeko eta elkar ezagutzeko sortu zen proiektua.
Askotariko egitaraua osatu dute Gazte Karpan, eta, horri esker, era askotako jendea bertaratzen ari zaie.
Askotariko egitaraua osatu dute Gazte Karpan, eta, horri esker, era askotako jendea bertaratzen ari zaie. RAUL BOGAJO / FOKU Tamaina handiagoan ikusi

Eider Etxeberria -

2018ko abuztuak 7
Jende aniztasuna, musika eta jai giroa. Baina, batez ere, gazteak. Horien presentzia da nagusi txosnaguneko Gazte Karpan. Gasteizko gazte mugimenduaren ekinbidez sortu zen gune hori, eta gazteen arteko harremanak indartu eta elkar ezagutzeko helburua du. Hartara, gazteen bilgune bihurtzen da eguerditik aurrera eta gau osoan. Unai Rodriguez antolaketa kideak azaldu du «gazteek antolatutako, kudeatutako eta dekoratutako espazioa» dela. Gazteongandik gazteontzako dute aurtengo leloa, eta seigarren urtea bete du.

«Gazteok, jaietan ateratzen garenon ehuneko handiena izanik, espazio komun bat behar genuen», nabarmendu du Marta Sendiu Gazte Karpako kideak. Jai eredu «alternatibo» bat eskaintzeaz gain, egitarau «plurala» antolatu dute gustu ezberdinetako gazteentzat. Antolamendu eredu «parekidea» izaten saiatzen dira, eta, hainbat lantaldetan banaturik, hilabeteak egon dira jaietarako antolatzen. Muntaketa egunak eta azken eguneko desmuntatze eguna «gogorrenak» direla azpimarratu dute bai Rodriguezek bai Sendiuk.

Txosnagunearekin batera, Gazte Karpa hilaren 3an ireki zuten. Ordutik, estilo ezberdinetako musika kontzertuak, DJak eta bestelako ekitaldiak izan dira han. Musika taldeak gehien bat Gasteizkoak eta Arabakoak dira. Talde horiek oholtzara igotzeko aukera izan dute Gazte Karpari esker; zenbaitek, lehen aldiz. Denetariko kontzertuak izan dira egunotan: hori horrela, era askotako publikoa gerturatu da, Sendiuk nabarmendu duenez: «Gainerako txosnetan eskaintzen ez den egitaraua aurki daiteke».

Aurten, gainera, dekorazio deigarria ikus daiteke karpa barruan: Nerea Mauleon ilustratzaileak Gasteizko gazte mugimenduaren 40. urteurrena dela-eta egindako margolanak ikus daitezke. Okume egurraren gainean egindako irudiek egun zehatzei egiten diete erreferentzia: Gasteizko Gaztetxearen irekiera, Libreren ekimenez egindako herri harresia, Osborneren zezena bota zutenekoa, Martxoaren 8ko eguna eta beste hainbat ekintza.

Jendez lepo egoten da gauero, eta, Rodriguezen esanetan, giro «osasuntsua» sortzen da. Gazteei «gustura egoteko beste giro bat» eskaintzen diete, haren ustez. Sendiuren iritziz, gazte asko «gainerako txosnetara baino lehenago» joaten dira hara.

Akelarre bat txosnagunean

Gaur, Gazte Eguna ospatuko dute: pintxo-potea, gazte bazkaria, Ginkantzipazioa, ekitaldia eta kontzertuak egongo dira egitarauan. Bones of Minerva metal-rock taldeak joko du 21:30etan, eta Tooth post-hardcore taldeak 22:30etan; akelarrea ospatuko dute 01:30etan, eta Aerosound-ek techno musika jarriko du 03:00etatik aurrera.

Txosnetako ohiturari jarraikiz, bertako produktuak lehenetsi dituzte. Murgiako Saltus garagardoa eskaintzen dute, Arabako garagardoa bultzatze aldera. Saltusen bi aukera dituzte: Anabasa eta Aztikeri. Ur botilak kendu dituzte, eta iturri bat jarri, plastiko zabor gutxiago sortzeko asmoz.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Apirilaren 7an eguneratua, 14:00etan. ©BERRIA

Koronabirusaren azken datuak

Berria

Euskal Herrian 12.401 gaixok eman dute positibo koronabirusaren proba eginda. 790 hil dira. COVID-19 gaitza izandako 4.149 pertsonari eman diete alta. Grafikoak, albiste barruan.

Zazpi kaletako metro sarrera, Bilbon. ©Aritz Loiola / Foku

Beste 77.200 kasu atzeman dituzte munduan

Berria

OME Osasunaren Munduko Erakundeak emaniko datuen arabera, munduan 1.279.722 COVID-19 kasu diagnostikatu dituzte dagoeneko, atzo baino 77.200 gehiago. Edonola ere, aurreko egunarekin parekatuta, %5 gutxiago dira gehituriko kasuak. Denera 72.716 pertsona hil ditu birusak dagoeneko munduan.

Urkullu lehendakaria eta Artolazabal Enplegu eta Gizarte Politiketako sailburua ©Irekia

ELAren eta LABen salaketari buruzko erabakia atzeratu egin du EAEko Justizia Auzitegiak

Jokin Sagarzazu

Urkulluk dio sindikatuek auzitara jo izanak ez duela «inolako justifikaziorik».

Lanbidek Bilbon duen buego bat, aurreko astean ©Luis Tejido (Efe)

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna