Irudia. Udaletxe plaza 2020ko uztailaren 14an
Adiorik ez, ezin izan dute-eta kalera atera
Ezetz, ez duela joan nahi. Eta hasi da berriz jira eta bira ziba balitz bezala, eta alde egin du, eta atera da berriz plazara. Brauliari kosta egiten zaio uztailaren 14an jendea agurtzea, eta bera bihurtu ohi da plazako erregina. Geltoki zaharrean lehen, Udaletxe plazan azken urteetan, jendetza bildu ohi da sanferminetako azken egunean erraldoiei, kilikiei, buruhandiei eta zaldikoei adio esateko. Haur batzuek zupakiak oparitzen dizkiete, eta guraso batzuek malkoari eutsi ezinik izaten dira, jakin baitakite irailera arte ez direla karrikara aterako. Atzo Udaletxe plaza zeharkatu zutenak errekaduak egiten ari ziren, edo, bisitariak baziren, udaletxearen atarian selfie bat egiteko aprobetxatu zuten. Inoiz baino errazagoa zen argazkia izorratzen duten horiek enkoadraketatik ateratzea. Adiorik ez, ezin izan dute-eta kalera atera. Eta batek baino gehiagok esan zuen gutxiago falta dela erraldoiak ikusteko, baina, oraingoan, jakin gabe zenbat gutxiago.
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
