Olabe: «Nortasuna dago proiektuaren oinarrian»

Liga amaitu eta lau egun geroago azaldu da Roberto Olabe Realeko futbol zuzendaria kazetarien aurrean denboraldiaz hitz egiteko. Olabek egoki jo zuen lehen taldeak osatu duen sasoia. Haren «garapena» nabarmendu du: «Argi eduki behar dugu zeintzuk diren gure nortasunaren oinarriak. Haiei eutsi diegulako sailkatu gara Txapeldunen Ligarako».

Datorren denboraldiaren plangintzaz galdetuta, Realeko kirol arduradun nagusiak azaldu du oraindik sasoia «ixten» ari direla, eta «goiz» dela. «Beharrak zehazten ari gara, eta bi barne bilera egin ditugu horretarako. Ezin dut zehaztasunik aurreratu, ez baitago ezer zehatzik».

Olabek azaldu duenez, «hiruzpalau» fitxaketa egingo dituzte, eta haietako bat Alexander Sorloth aurrelari norvegiarra izatea nahi dute: «Oso gustura gaude egin duen lanarekin. Ez alferrik, azken urteetan berriz ekarri dugu hona. Ez da gure jabetzakoa, ordea, eta, lehendabizi, jakin egin behar dugu Leipzigek zer asmo duen: errendimendu kontuengatik nahi duten, edo negozioa duten buruan». Alvaro Odriozola Realeko jokalari izandakoarena da bolo-bolo dabilen beste izena, baina Olabek ezer gutxi esan du. «[Real Madrilen] bi urteko kontratua du indarrean».

Asier Illarramendik taldea uzteaz, esan du mutrikuarrak «naturaltasunez» egin duela taldea uzteko hautua, eta neguan jada esan ziela zalantzak zituela taldean jarraitu edo ez.

Aitzitik, «uda luzea» aurreikusi du talde dirudunei dagokienez, baina oraingoz Realean «lasai» daudela zehaztu du: «Inork ez digu esan alde egin nahi duenik». Mikel Merinori bi urte barru bukatuko zaio kontratua, eta horren inguruan Olabek adierazi du ez daudela kezkatzeko arrazoirik. Martin Zubimendiz, berriz, esan du «Realaren 4a izatea onartu» duela, baina jokalariak ere ez dakiela zer gerta daitekeen etorkizunean.