Euskaldunon Egunkaria itxi zuten urteko Sant Jordi eguna oso berezia izan zen. EgunkariaEndavant argitalpenaren milaka ale banatu zituzten Rambletan. Azaleko Tots i totes som Egunkaria leloak barrualdeko idazleen eta politikarien testuak laburbiltzen zituen. Lluis Xirinacs idazle eta politikariak hauxe zioen: «Euskarazko komunikabidearen alde Herri Katalanetan izan duen adierazpenak ez dira elkartasunezkoak soilik izan. Gertatutakoak zuzenean jo gaitu: gure kontra ere egin du; espainiarra ez den herri, kultura eta hizkuntza ororen gaineko zapalkuntza pairatzen ari garelako. Eskubidea gure alde dago, baina ekintza guztiak haien alde».
Handik hamabost urtera, Xirinacsek esandakoak gaur-gaurkoak dira oraindik, eta atzoko Sant Jordi eguna ere berezia izan zen, nahi duguna eta nahi ez dutena pentsatzeko eta idazteko eskubidearen adierazpena; herri, kultura eta hizkuntzen askatasunarena, arrosa gorrien artean horiena, kolorea bera mehatxutzat jotzen den egoera errepresibo batean. Joan-Lluis Lluis Jo sóc aquell que va a matar Franco eleberriaren egile eta Sant Jordi sariaren irabazleak gogoeta hau egin du, liburuko fikzioaren eta egungo egoeraren «kasualitatezko» antzekotasunez: «Franco hil beharra dago egunero, ez baitzen hil 1975ean. Frankismoa hibernazioan sartu baino ez zen egin». Ezberdinen kontrako integrismo espainiarra deitu dio.
HIZPIDEAK
Franco eta gu
Iruzkinak
Ez dago iruzkinik
Ordenatu