OSASUNA 0 - 2 REALA
Reala nagusi Sadarren
Golak. 0-1: Sergio Herrerak b.a. (5. min.). 0-2: Take Kubok (90. min.).
Garaipen garrantzitsua lortu zuen Realak atzo, Sadarren, Osasunaren aurkako derbian. Sergio Herrerak nahi gabe sartu zuen baloia bere atean partida hasi eta berehala, eta maldan gora jarri zitzaion partida Osasunari. Gorritxoak ahalegindu ziren berdinketa lortzen, baina partidaren hondarrean Take Kubok 0-2koa egin zuen. Aurrerapauso nabarmena da Realarentzat Txapeldunen Ligako postuetan sendotzeko.
Osasuna oso talde sendoa izaten da Sadarren jokatzen duen bakoitzean, baina bereziki arriskutsua izaten da lehen minutuetan. Atzera begiratu ere egin gabe egiten dute aurrera, eta hegaletatik erdiraketa andana egiten dituzte. Atzo, baina, Reala izan zen lehen minutuetan nagusitu zen taldea. 3. minutuan Mikel Merinok barkatu egin zuen, baina hurrengo jokaldian gola egin zuten txuri-urdinek. Ander Barrenetxearen erdiraketa bere atera desbideratu zuen Sergio Herrerak.
Golaren ostean aurrera egin zuen Osasunak, eta pixkanaka neurria hartu zion partidari. Kike Garciak aukera argia izan zuen, gainera, berdinketa ezartzeko, baina ez zen fin ibili. Bigarren zatiaren hasieran ikusi zen lehen aipatutako Osasuna bertikal hori. Oldarkorra izan zen defentsan, eta erasoan min egin zuen trantsizio azkarrekin. Hala ere, Realak izan zituen bigarren zatiko aukera garbienak. Mikel Oiartzabal eta Alexander Sorloth bigarren zatian zelairatu ziren, eta bakoitzak aukera garbi bana izan zuen. Eibartarraren errematea Herrerak atera zuen atepean, eta Sorlothek berriz zutoinera bidali zuen baloia dena alde zuenean. Aurrelariek ez zuten asmatu, baina partida amaitzear zegoela 0-2koa egin zuen Kubok, area barruan ezkerrarekin egindako erremate batekin.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
