Unea da, bai!

Olatu Geldiezina sortu behar dugu, gizarte hau aldatu nahi dugun pertsona kopuru handienak parte har dezan. Ikusezinak ikusarazteko unea da. Estatistiketarako kontatzen ez duten horiek. Eskubide guztiak ukatzen zaizkielako existitzen ez direnak. Atzerritartasun Lege anker batek bortxaz lege orotatik kanpo uzten dituenak. Baita kontraturik gabe lan egiten dutenak, erroldarik gabe plastikozko txaboletan gaizki bizi diren sasoikako langileak eta gure artean bizi diren gainerako baztertuak ere. Barruko eta esklabo bihurtutako etxeko langile guztiak. Kontraturik eta eskubiderik gabeko sexu-langileak, salerosketaren biktimak, batez ere emakumeak eta adingabeak. Hau da, gure artean bizi diren eta gizarte honetako kide diren milaka pertsonek ez dute ezertarako kontatzen, eta, are okerrago, ez zaie konta dezaten itxaroten.

Aniztasuna, zalantzarik gabe, giza eta kultur aberastasun handia da. Gizateria beti migratu eta nahastu da. Sarritan egin du hori Euskal Herriak. Beste gauza bat al da batzuek «diaspora» deitzen dutena? Gaur egungo migrazio masiboak bereizten dituena Ipar Globaleko politika kriminalengatik duten jatorria da. Beharrezkoa da munduko mapa errepasatzea eta gose diren milioika pertsona eta zergatik dauden egoera horretan egiaztatzea. Bost urte bete baino lehen hiltzen diren milaka eta milaka haurrengan pentsatzen jarraitu behar da. Beharrezkoa da pentsatzea zenbat neskato eta gaztek pairatzen duten salerosketa eta/edo zenbat dauden esklabo. Jakin behar da zergatik milioika pertsonak utzi behar dituzten beren herrialdeak hainbat kontinentetan, eta indarrean dagoen politikak biztanleria baztergarritzat jotzen dituen. Horrek lagunduko liguke ulertzen gaur kriminalizatu, jazarri, espetxeratu egiten dela, edo, besterik gabe, hiltzen uzten dela Ipar Munduko herrialdeetara iritsi nahi dutenei laguntzarik ez emateagatik. Zergatik lortzen dira akordio kriminalak Libiarekin, Marokorekin eta Turkiarekin, soilik pertsona pobreak Europako Batasunera iristea eragozteko, diruaren truke? Eta iristen badira, zer gertatzen da pertsona horiekin? Horretarako dago Atzerritarrei buruzko Legea, eta bere bizitzako urte luzeetako kalbarioa, legez kanpo eta eskubiderik gabe. Horregatik dira hain beharrezkoak Erregularizazioa orain! bezalako kanpainak.

Baina ezin izango da inoiz Olatu Geldiezin hori lortu, dagoeneko gure artean dauden pertsona guztiak kontuan hartu gabe, horiek baitira kapitalismoaren eta bere politika liberalen izateko arrazoia den eskubide-lapurreta horren kaltetu nagusiak. Ezinezkoa da! Isildutako gutxiengo horien erreibindikazioak kontuan hartu gabe, haien ekarpen anitzak kontuan hartu gabe, ez da posible esaten dugun Euskal Herria eraikitzea, Euskal Herri sozialista, feminista, anitza eta oreka ekologikoan oinarrituriko herria eraiki nahi dugu, guztiok duintasunez bizitzeko adina baliabide izango dituena. Lanari ekiteko unea da.

Eskubide guztiak pertsona guztientzat leku guztietan. Erregularizazioa orain! Bizi diren pertsona guztientzat, ukrainarrak izan ala ez. Inor ez da legez kanpokoa, atzerritarrei buruzko legea berehala indargabetu.