Kolpeei eusteko prest dagoela erakutsi du

Golak. 1-0: Jordi Albak (85. min.).

Emaitza ez da jakina, baina ia ziurra da Osasunak sufrimenduzko minutuak izango dituela Real Madrilen aurkako Espainiako Kopako finalean. Uneren batean, mahukak bildu eta bere atetik gertu defendatzea egokituko zaio. Zentzu horretan, prestaketa ezin hobea izan zuen atzo Bartzelonaren zelaian. Ez zen kikildu liderraren aurrean, ordubete luzez hamar jokalarirekin aritu behar izan zuen arren. Gogotik egin zuen lan golik ez jasotzeko, eta ia bukaerara arte iraun zuen zutik. Albak apurtu zuen harresia, 85. minutuan.

Larunbateko lehia gogoan izanik, goitik behera aldatu zuen hamaikakoa Jagoba Arrasatek: bederatzi aldaketa egin zituen. Aukera eman zien harrobiko zenbait jokalariri; adibidez, Jorge Herrandori. Lehen partida zuen Lehen Mailan, eta gutxi iraun zion pozak, txartel gorria ikusi baitzuen 26. minutuan. Azken jokalaria zen, eta bultza egin zion Pedriri.

De Jongen pase sakon batek eragin zuen egoera hori. Herbeheretarrak gorritxoen bizkarrera bidalitako baloiak izan ziren Bartzelonaren argudio nagusia lehen zatian. Bestela, Osasunak apenas izan zuen arrakalarik atzeko lerroan. Espazioak ondo itxi zituen txartel gorriaren aurretik, baita ondoren ere. Kataluniarrak behin eta berriz hurbildu zitzaizkion areara, baina lehen zatian jaurtiketa bakar bat ere ez zioten egin.

Atsedenaren ostean, baina, erruz egin behar izan zuen lan Aitor Fernandezek. Etxekoek askoz ere zorrotzago jardun zuten, eta erakustaldia egin zuen Osasunako atezainak. Gelditu ederrak egin zizkien Ansu Fatiri, De Jongi eta Lewandowskiri. Jokaldiei ginga jarri ezinik zebiltzan kataluniarrak. Baloi bat sareratzea lortu zuten 79. minutuan, baina Ferran jokoz kanpo zegoen.

Osasuna ausartu zen Bartzelonaren arean agertzen. Iker Muñozek izan zuen aukerarik onena, areaz kanpoko jaurtiketa batekin. Halere, garaipenak utopia zirudien. Bartzelonak setaz bilatu zuen gola, eta azken txanpan aurkitu zuen zirrikitua. Galdu arren, lehiarako prest dagoela erakutsi zuen Osasunak.