Albistea entzun

Zenit San Petersburgo 72-66 Kirolbet Baskonia

Ezin du okerrago egin

Baskoniak galdu egin du San Petersburgon, Zeniten kontra. Gasteiztarrak oso gaizki aritu dira berriz, batez ere azken txanpan
Tornike Xengelia eta Colton Iverson, lehian, atzo, Zenit San Petersburgoren kantxan.
Tornike Xengelia eta Colton Iverson, lehian, atzo, Zenit San Petersburgoren kantxan. ANATOLI MALTSEV / EFE Tamaina handiagoan ikusi

Julen Etxeberria -

2020ko urtarrilak 16

Zenit San Petersburgo. Renfroe (6), Hollins (2), Ponitka (14), Thomas (19), Iverson (10) —hasierako bostekoa—; Albicy (5), Voronov (3), Zubkov (3), Abromaitis (5), Ayon (5), Puxkov eta Truxkin,

Kirolbet Baskonia. Henry (13), Janning (9), Shields (4), Xengelia (13), Fall (2) —hasierako bostekoa—; Diop (4), Stauskas (15), Eric (6), Polonara eta Garcia.

Markagailua. 23-16, 39-31 (atsedenaldian); 53-49 eta 72-66.

Epaileak.Latisevs, Panther eta Vilius. Ez zuten inor kanporatu.

Bestelakoak. 3.510 ikusle San Petersburgoko Sibur Arena pabiloian. Pabiloiko erloju nagusiek ez zuten funtzionatu lehen zatian.

Kirolbet Baskoniak nekez egin dezake beherago Euroligan. Zaila zirudien, egiten ari den denboraldi eskasa kontuan hartuta, baina atzo hondoa jo zuen, hondoa jotzea baita azken sailkatuaren aurka galtzea. 72-66 irabazi zion Zenit San Petersburgok 19. jardunaldiko partidan. Sasoiko hamaikagarren muturrekoa da, eta are gehiago zailtzen du jada oso zaila dirudien helburua: lehen zortzi sailkatuen artean geratzea eta final-laurdenak jokatzea.

Oso gaizki aritu zen berriz Baskonia. Estatistikak argigarriak dira: 66 puntu besterik ez zuen sartu, eta hemeretzi baloi galdu zituen. Nekez irabaz daiteke halako erraztasunak emanda. Hala ere, ez zuen urrun izan garaipena, Zenit ere apal jardun baitzen: hogei baloi galdu zituen. Baina etxekoak hobeto aritu ziren erasoan, eta batez ere, ez zuten kale egin une erabakigarrietan. Horren adibiderik argiena dira Baskoniako jokalariek egindako azkeneko erasoak, minutu eta erdi eskas falta zela eta 65na berdinduta zirela: Henryk, Xengeliak eta Shieldsek jaurtiketa bana huts egin zuten, eta Stauskasek eta Henryk baloi bana galdu zuten—frantziarrak sei galdu zituen—. Zaila da horren gaizki jokatzea lehia amaiera bat. Txakalaldi horrek ezerezean utzi zuen Baskoniaren susperraldia. Izan ere, ordu erdi pasatxoan kontrakarrean aritu ondoren, gai izan zen emaitza iraultzeko: 59-60. Baina lan hori harrika bota zuen.

Thomas, erabakigarri

Xengelia izan zen berriro onena gasteiztarren artean: hamahiru puntu sartu zituen, sei errebote jaso eta beste sei asistentzia eman; 24 puntuko balorazioa. Etxekoen artean, berriz, Will Thomas nabarmendu zen: hemeretzi puntu sartu zituen, eta sei errebote hartu; 27 puntuko balorazioa.

Atzokoak ez dio inolako mesederik egingo Baskoniari aste honetan dauzkan beste bi erronka handiei begira: bihar, CSKA Moskuri egingo dio bisita; eta igandean, Real Madrili, ACB ligan. Ondo arituta ere, benetan zaila baita bi talde horiei irabaztea, zer esanik ez atzo bezain gaizki jokatuta. Horrela, ezinezkoa da. Are gehiago, arriskua dago beste behin lotsagarri geratzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Zabaleta eta Elezkano, dronetik txapelak hartzen. ©Aritz Loiola / Foku

Elezkano II.a-Zabaleta jaun eta jabe izan dira finalean

Berria

Zabaletak partida ikusgarria jokatu du, eta txapelketako pilotaririk onenaren saria eman diote. Hirugarren txapela lortu du Binakakoaren finala irabazita. Elezkanok, berriz, bigarrena.

Recio, golaren penaltia jaurtitzen, Getafen. ©Mariscal / Efe

Eibarrek itxaropena lortu du, azken unean egindako gol bati esker

Berria

Reciok egin du gola, penaltiz, 89. minutuan. Partidan ez da aukera askorik izan, bi taldeak oso zuhur aritu baitira.

Athleticen eta Realaren arteko derbia, Lezaman. ©Aritz Loiola / Foku

Athleticek luzapenean irauli du markagailua, Oihanek partida piztu eta gero

Berria

Bi taldeek ez dute aise asmatu gola egiten. Reala 82. minutuan aurreratu da, eta atzetik beste bi egin ditu Athleticek, minutu gutxian emaitzari buelta emanez.

Super Amara Bera Berako kideak, liga irabazi izana ospatzen, atzo, Donostiako Gaska kiroldegian. ©JON URBE / FOKU

Bera Berak zazpigarrenez irabazi du Espainiako Liga

Julen Etxeberria

Bera Berak 30-20 hartu du mendean Elx Donostian, eta zazpigarrenez irabazi du Espainiako Liga. Hogeigarren titulua du, hamabosgarrena azkeneko hamar urteetan

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Julen Etxeberria

Informazio osagarria

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna