Olatua Euskal Herrira iristeko itxaropena

Euskal alderdietako eta sindikatuetako ordezkariak present izan dira Kataluniako Diadan. Askok itxaropenez kasu egin diote erabakitzeko eskubidearen alde kataluniarrek egindako aldarriari. «Euskal Herriko eta Kataluniako prozesuak beti egon dira lotuta»; hala uste du Ainhoa Etxaide LABeko idazkari nagusiak. Bestalde, ELAko Adolfo Muñozek uste du arrakasta izateko «osagai guztiak» biltzen dituela prozesuak. «Asko indartu dira orain 300 urte kendutako subiranotasuna berreskuratzeko eman beharreko pausoak». EAJko eta EH Bilduko ordezkariek ere parte hartu dute V erraldoian. Kataluniarren borondatea errespeta dezala eskatu dio Andoni Ortuzar jeltzaleak Mariano Rajoy Espainiako presidenteari. «Kataluniaren ahotsa entzun egin behar du». Eta babesa erakutsi dio Kataluniako gizarteari.