Albistea entzun

Eibar 1-2 Reala

Zarata eta isiltasuna

Realak lehen aldiz irabazi du Eibarren Lehen Mailan, eta laugarren da. Eibar zulotik hurbil dago, etxean berriz ere galtzaile izanda. Ateak itxita jokatu dute
Alex Remiro Realeko atezainaren geldiketa bat, atzo, Ipuruan.
Alex Remiro Realeko atezainaren geldiketa bat, atzo, Ipuruan. JUAN CARLOS RUIZ / FOKU Tamaina handiagoan ikusi

Aitor Manterola -

2020ko martxoak 11

Golak. 0-1: Oiartzabalek (penaltiz, 16. min.). 0-2: Willian Josek (75. min.). 1-2: Charlesek (penaltiz, 90. min). Epailea. Medie Jimenez. Txartel horiak Eibarreko Bigas, Jose Angel, Escalante eta Realeko Zubeldia eta Januzaji. Bestelakoak. Ateak itxita jokatu zen partida Ipuruan, Ligak (LFP) koronabirusari aurre egiteko hartutako neurri bezala.

Harmailetako hotsik gabe jokatu behar izan zuten atzo Ipuruan Eibarrek eta Realak, koronabirusa dela eta ez dela. Jokalarien eta entrenatzaileen oihuak, aginduak eta kexak baino ez ziren entzun ahal izan atzo. Medie Jimenez epaileak partida amaiera adierazi zuenean, Realeko jokalarien poza ozen entzun zen, zarata balitz bezala, eta Eibarrekoen isiltasuna ere ozen hedatu zen.

Derbia Realak irabazi zuen, eta lehenengo garaipena du Ipuruan Eibar Lehen Mailan denetik. Aurreko bost aldietan puntu bakarra baino ez zuen atera. Sailkapenean laugarren jarri da, datorren denboraldian Txapeldunen Ligan jokatzeko aukera ematen duen azkeneko lekuan. Eibarrentzat, aldiz, bigarren kolpe gogorra da etxean hiru egunen buruan, eta ondorioa larria da: bi puntura du jaitsiera, eta laura azken aurrekoa. Eta etzi, non eta Real Madrilen zelaian jokatu behar du.

Isiltasunaren eta harmaila hutsen partida izaten hasi zena penaltiena bilakatu zen, hiru adierazi zituelako epaileak: bi etxekoan alde, eta bat atzo kanpotar zenaren fabore. Hirurek, gainera, motibo bera izan zuten funtsean: baloiak eskuan jotzea, hiru kasuetan horrela izan zelako. Aurreneko jaurtiketa zuzen horietakoa Realak izan zuen alde hamaseigarren minutuan. Bigasen eskua aurkitu zuen Januzajen jaurtiketak, eta Oiartzabalek egin zuen 0-1ekoa. Lehenago ere izan zuen aurretik jartzeko aukera Imanolen taldeak, bigarren minutuan Willian Josek kanpora bota zuen baloiarekin.

Reala ez zen ari gehienetan egiten duen jokoa egiten, eta Eibarren presioari ihes egiteko, baloia azkar jotzen zuen gora. Baina ez jotzeagatik: Willian Jose bilatzen saiatu zen, edo etxekoen atzelarien bizkarrean baloia jartzeko saialdiak egin zituen. Baloia ez zuenean, bere zelaian sartuta egon zen, eta batzuetan atera zuen presioa gora. Eibarrek baloia zeukan, eta ondo mugitu zuen alde batetik bestera, baina aukeran, makalegi eta bertikala izan gabe. Hala ere, berdintzeko aukera 28. minutuan izan zuen, partidako bigarren penaltiaren bidez. Zubeldiari eskuan jo zion Kikeren burukadatik eratorritako baloiak, eta Orellanak hartu zuen ardura. Remirok bikain urrundu zion, ordea.

Reala nagusi bigarrenean

Atsedenalditik bueltan, ez zen aldatu partidaren traza, baina Eibar azkarrago zebilen baloia mugitzen. Eraginkortasuna, ordea, lehengoaren parekoa zen: ia ezer ez. Reala eroso antzean zegoen, eta are erosoago jokatzen hasi zen etxekoek erdilari bat kendu eta bigarren aurrelaria jartzean. Baloia mila bider lapurtu zelai erdian, eta aukera onak izan zituen bizkor ateratzeko.

Asmatu, baina, 75. minutura arte ez zuen asmatu, Willian Josek bigarren gola egin zuenean, jokaldi ona bukatuz. Etxekoak jota utzi zituen horrek, eta beste penalti batek baino ez zituen suspertu, 89. minutuan —Zalduari eskuan jotako baloiak eragindakoa—. Charlesen golak, ordea, ez zuen ezer aldatu.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Alaveseko jokalariak, Loumek sartutako gola ospatzen. ©Raul Bojao / Foku

Sakon hartu du arnasa

Eñaut Agirrebengoa

Alavesek bigarren garaipena kateatu du, Elxen aurka, Loumen gol bati esker. Jaitsieratik irten da behin-behinean

Gorka Urbizu, Berri Txarraken azken kontzertuan, 2019an. ©Idoia Zabaleta, FOKU

Gorka Urbizuk emanaldia eginen du Realaren eta Athleticen arteko derbian

Uxue Rey Gorraiz

Partidaren aurretik eta atsedenaldian joko du Urbizuk, Reale Arena estadioan. Iradoki dute sorpresa gehiago ere izanen dela neurketaren atarian.

 ©JUANAN RUIZ / FOKU

Oraina eta etorkizuna

Jone Bastida Alzuru

Zeresana ematen ari da Salsamendi pilotaria. 14 urte baino ez ditu, baina maila ikusgarria duela erakutsi du, eta gai izan da goi mailako pilotariei irabazteko. Bideaz gozatzen ari dela dio, eta horretan jarraitu nahi du. Orain min hartuta dago.
Gari Bravo Euskaltel-Euskadiko txirrindularia eta Jon Irisarri Caja Ruralekoa, herenegun, Tolosan, Iñaki Lopetegi zenaren oroimenezko proban parte hartu aurretik. ©ANDONI CANELLADA / FOKU

Etapa berri bat dute aurrean Gari Bravok eta Jon Irisarrik

Iñigo Lasa

Txirrindularitza profesionaletik erretiroa hartu berri dute Gari Bravok eta Jon Irisarrik. «Lasai eta damurik gabe» utzi dute. «Pribilegiatuak» sentitzen dira gehien gustatzen zaiena egiteko aukera izan dutelako. Biak goi mailako ikasketak egiten ari dira bide berri bati ekiteko asmoz.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.