Albistea entzun

Futbola. Espainiako Kopako finala. Olga Garcia. Atletico Madrileko jokalaria

«Realak ez du guk baino ilusio handiagoa. Guk historia egin nahi dugu»

ALBERTO SAENZ MOLINA Tamaina handiagoan ikusi

Julen Etxeberria -

2019ko maiatzak 9

Lau egun eskas joan dira Atletico Madrilek hirugarrenez jarraian Espainiako Liga irabazi zuenetik. Lorpen handia izanagatik, Olga Garciak (Dosrius, Herrialde Katalanak, 1992) aitortu du «aspaldi» utzi dituztela «bazter batean» ospakizun guztiak. «Ginga jarri nahi diogu sasoiari, eta, behingoz, Kopa irabazi. Barruan daukagun arantza hori atera nahi dugu».

Lehiak ez du etenik. Duela lau egun liga irabazi zenuten, eta bi egun barru beste titulu bat irabazteko lehiatuko zarete. Ia ez duzue izan denborarik ligako titulua ospatzeko.

Halakoa da futbola. Apenas izan dugun astirik ezer ospatzeko. Bukatu eta gutxira jada buruan genuen Kopako finala.

Denak ados daude: finalak ez du antzik izango ligan elkarren aurka jokatu zenuten azken partidarekin. Ados zaude iritzi horrekin?

Bai. Ligako azken partidan guk titulua genuen jokoan, eta Realak, aldiz, hiru puntu besterik ez. Kopako finalean, ordea, biok dugu gauza bera jokoan, gauza handi bat, gainera: titulu bat.

Nolako partida espero duzu?

Zubietan jokatutakoaren kontrakoa. Biok zelairatuko gara irabazteko asmoz, eta horrek oso erakargarri egingo du partida.

Gauza bat ez da aldatuko: zuek zarete faborito.

Faborito hitza engainagarria da, are gehiago titulu bat jokoan dagoen partida batean. Edozer gerta daiteke.

Presio osoa izango duzue zuen bizkar?

Ez dut uste. Azken partida balitz bezala jokatu ditugu lehia guztiak, ez dugu inoiz pentsatu hurrengo norgehiagoka irabaztea ez den beste helburu batean. Nire ustez, hori izan da gakoa hirugarren aldiz jarraian liga irabazteko.

Realak baino eskarmentu handiagoa duzue halako partida garrantzitsuak jokatzen.

Horretan bai, koska bat gainetik gaude, jokalari gehienok sarritan jokatzen baititugu nazioarteko partidak; adibidez, Txapeldunen Ligakoak. Hiru liga irabazi ditugu ere. Horri guztiari esker, jokalariok badakigu nola aurre egin halako partida handiei. Halere, beti esan ohi da oso kontuan hartzekoa dela lehen aldiz final batera iritsi den talde batek duen ilusioa. Eta Reala lehen aldiz ariko da final batean, eta ziur naiz sekulako ilusioa duela. Baina guk ere badugu ilusioa; lehen aldiz liga eta Kopa irabazi nahi ditugu sasoi berean.

Zertan da indartsuen Reala?

Beti gustatu izan zait asko Reala: bere filosofia, nola bizi den bertan futbola, zer-nolako azpiegitura ederrak dituen... Fitxatzen dituen jokalari gehienek azkar barneratzen dute talde horren funtsa. Zelaian, berriz, talde arriskutsua da, langilea, borrokalaria eta oso batua. Jokalari bizi-biziak ditu; adibidez, Nahikari eta Carla Bautista. Kontraerasoan min handia egin ohi dute. Badakigu gertutik zaindu beharko ditugula.

Ilusioz gainezka dago Reala. Arduratzen zaituzte horrek?

Ez, guk ere sekulako ilusioa baitugu. Guretzat ere handia litzateke lehen aldiz sasoi berean liga eta Kopa eskuratzea. Ez dute guk baino ilusio handiagoa.

Neurria hartua diozue Realari. Duela lau urte ez duzue galdu haren aurka.

Hala da, baina esan ohi den moduan, estatistikak hori dira: estatistikak besterik ez. Sarritan geratzen dira hankaz gora. Partida batean, edozer gerta daiteke.

Zuk zeuk oroitzapen ederra duzu Realaren aurka jokatuko partida batez. Sasoi honetan, lehen itzulian, hiru gol sartu zenizkion partida batean.

Ederra da partida berean hiru gol sartzea, noski, baina niri axola didan bakarra taldeak irabaztea da. Zorionez, Bartzelonaren aurkako bi partidak ez beste, guztiak irabazi ditugu Espainiako lehiaketetan. Oso ondo ari gara, eta horrek konfiantza handia ematen digu.

Finalean Realari jokalariren bat kentzeko aukera bazenu, nor kenduko zenioke?

Ez nuke jakingo zein. Ez zen lehen aldia izango ustez talde bati jokalari onena kendu eta talde horrek askoz hobeto jokatu duela.

Non egongo da gakoa?

Lehen gola sartzen duen taldeak aukera asko izango ditu irabazteko, presio handia sartuko baitio aurkariari.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Tati Garmendia, Rafa Pueyo, Braulio Vazquez kirol zuzendariak ©JON URBE / FOKU

Galbahe lana dagokie

Iñaki Berastegi

Merkatua arakatu eta jokalariak fitxatzea baino konplexuagoa da klubetako kirol zuzendarien lana. Aurrekontuak lana erabat baldintzatzen dienez, irizpide zehatz eta errealistak ezarri behar dituzte arrakasta izan nahi badute. Orokorrean, jokalari bati taldean ez duela jarraituko azaltzea izaten da zailena.

Athletic argitasunik gabe beste behin

Athletic argitasunik gabe beste behin

Ainara Arratibel Gascon

Zuri-gorriek 0-0 berdindu dute Getafaren zelaian. Lehen zatian jokoaren ekimena izan dute, baina argitasuna falta izan zaie. Bigarren zati kaskarra jokatu dute, ordea. Zazpi jardunaldi daramatzate irabazi gabe.

 ©ARITZ LOIOLA / FOKU

«Txapeldun izateak azken lasterketako arantza ateratzeko balio izan dit»

Unai Ugartemendia

Bi aste besterik ez da igaro Sandra Sevillanok International Skyruning Federationeko Europako Ultra Txapelketa irabazi zuenetik. Portugalgo Pisao Extreme lasterketan izan zen.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.