Irakats-hizkuntza gaztelania izatea proposatu dute

Hizkuntzen aferak bereziki hezkuntzan eragin ohi du, eta gaztelaniaren gailentasuna eskoletara ere eraman nahi dute eskuineko alderdiek. PPk berreskuratu egin nahi du LOMCE legearen eredua, eta honako planteamendu hau egin du: «Ohiko irakats-hizkuntza gaztelania izango da Espainiako lurralde osoan, eta hizkuntza koofizialak dituzten lurraldeetan hizkuntza horiek ere izan ahalko dira irakastekoak». Areago doa Vox: «Espainierak izan behar du derrigorrezko irakats-hizkuntza; koofizialak, aukerakoak».

PSOEk eleaniztasunaren alde egin du: «Bi edo hiru hizkuntza menperatzea gero eta ezinbestekoagoa da, eta abantaila edo desabantaila faktorea da». Ikastetxeetan eleaniztasun planak egin nahi ditu. Irakurketa bultzatzeko plan bat ere aipatu dute sozialistek, «estatuko hizkuntzak» kontuan hartuko dituen proiektu bat.

Unidas Podemosek ez du hizkuntzei buruz aipamen zehatzik egin hezkuntzaren arloan; «gure hizkuntzak» atzerrian irakastea soilik.