Pagonabarraga eskolarteko txapeldun

Gorka Pagonabarragak (Durango, Bizkaia) jantzi zuen atzo Euskal Herriko 30. Eskolarteko txapela, Sarako (Lapurdi) trinketean. Goizeko hamaikak pasatxo ekin zioten lanari15-18 urte bitarteko hamahiru finalistek: Pagonabarragarekin batera, Irati Alcantarillak (Urruña, Lapurdi), Iruri Altzerrekak (Garai, Bizkaia), Oihana Aranak (Eskoriatza, Gipuzkoa), Aroa Arrizubietak (Gasteiz), Haitz Capotek (Zalgize, Zuberoa), Elixabet Etxandik (Izpura, Nafarroa Beherea), Julen Etxeberrik (Zaro, Nafarroa Beherea), Xabat Illarregik (Leitza, Nafarroa), Aner Peritzek (Zarautz, Gipuzkoa), Hodei Renteriak (Angelu, Lapurdi), Aitor Ugartek (Aramaio, Araba) eta Ekiñe Zapiainek (Bera, Nafarroa).

Eguneko lanak

Ainhoa Sarasua aurkezleak egin zien harrera, eta Julene Etxeberri aritu zitzaien gai jartzaile. Zortziko handi eta txikiko ariketetan puntu gehien lortu zutenek egin zuten aurrera finalean: Alcantarillak, Aranak, Etxandik, Peritzek, Pagonabarragak eta Ugartek. Bigarren bueltan, lehen puntua emanda eta gaia emanda aritu ziren, zortziko txikian eta bost puntuko neurrian. Lanok egin ondoren, Peritz bigarren sailkatu zen, Paganabarragaren atzetik. Mikel Mendizabalek jantzi zion txapela azken horri. «Jarrai dezagun kantari» kantatuz agurtu zituen txapeldunak bertaratutakoak, eta, segidan, finalaren karietara antolatutako bazkariaz eta festaz gozatu ziren.

Bertsozale Elkarteak eta Ikastolen Elkarteak 1989an antolatu zutenlehen aldiz Euskal Herriko eskolarteko bertso txapelketa.