Arabako Auzitegiko buruak esan du 'De Miguel auziko' epaia atzeratu egingo dela

Mercedes Gerrerok azaldu duenez, «oso zaila» ari da izaten sententzia osatzea. Azken zehaztapenen faltan, Gabonak baino lehen espero dute
Alfredo De Miguel, EAJren ABBko kide ohia, iazko abenduan.
Alfredo De Miguel, EAJren ABBko kide ohia, iazko abenduan. ENDIKA PORTILLO / FOKU

Edurne Begiristain -

2019ko urriak 16
Iazko urtarrilaren 8an hasi zen Arabako Probintzia Auzitegian EAJko hainbat kide ohik ustez gidatutako legez kanpoko komisioen tramari buruzko ahozko epaiketa, eta urte bereko abenduaren 19an epaiaren zain geratu zen auzia. Ordutik ari dira epaimahaiko kideak ebazpena prestatzen, baina uste baino gehiago luzatzen ari zaie lana. Izan ere, aurtengo udazkenerako espero zen epaia —urrirako esan zuten—, baina atzo goizean Mercedes Guerrero Arabako Probintzia Auzitegiko presidenteak Radio Vitorian jakinarazi zuen «atzeratu» egingo dela ebazpena, eta urtea amaitu arte ez dutela kaleratuko: «Urrian ez da posible izan, eta ez da posible izango». Guerrerok ez du datarik eman, baina esan du epaimahaikideak «azken zehaztapenak» ari direla lantzen, eta udazkenaren amaiera aldera espero dutela epaia prest izatea. Haren aurreikuspenen arabera, «Gabonak baino lehen» egongo da sententzia. Epaileak aitortu du «oso zaila» izaten ari dela sententzia egitea, auzia «oso konplexua» delako.

Urrirako espero zen sententzia, baina ez zen espero urrian jakinaraztea Espainiako Gorteetarako hauteskundeak egingo direla azaroaren 10ean. Sententzia atzeratzeko benetako arrazoia hori ote den galdetuta, garbi erantzun du Guerrerok: «Epaileok ez gara mugitzen egutegi politikoaren arabera. Gure egutegia ezberdina da».

De Miguel auzia da Arabako, Bizkaiko eta Gipuzkoako inoizko ustelkeria epaiketarik handiena: 26 akusatu daude. Akusatu nagusia Alfredo De Miguel EAJren ABBko kide ohia da, eta fiskalak 29 urteko kartzela zigorra eskatua du harentzat —Aitor Telleria eta Koldo Otxandiano dira EAJren ABBko beste burukide ohiak—. Legez kanpoko komisioak jaso eta hirigintza operazioekin iruzurra egitea egozten diete Alfredo de Migueli eta beste 25 laguni. Denera, hamaika delitu egozten dizkiete, tartean eroskeria, dirua zuritzea, dokumentuak faltsutzea eta prebarikazioa. 2009ko abenduan irten zen argitara De Miguel auzia; Ainhoa Alberdi abokatu eta enpresariak fiskaltzaren aurrean salaketa jarri zuelako eskatu zizkioten komisioen harira.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna