Iruñeko alkatearen kontraerasoa

Nafarroako —Opusen— Unibertsitate Klinikan dena prest zuten sanferminak hasi aurretik. Irrintziko paperek argi azaltzen dute plana. Enrique Maia alkateak nahiago luke jendeak txapela kenduko balu prozesioan aurrera egiten duen bitartean, baina 2019an bera izan zen txapelik gabe gelditu zena. Curia karrikako oihuen artetik esku bat agertu zen alkateari xixtera botatzeko. Orduz geroztik zuen mendekua hartzeko gogoa.

Baina sanferminik ez da izan azken bi urteetan, eta ezin deus egin eraso hari erantzuteko. Txar guziak badu onik, hala ere, eta pandemiak eman zion ideia alkateari. COVID-19ak jota ospitalean zegoela etorri zitzaion burura: «Ezker abertzaleko terrorista totalitarioak kutsatzea litzateke kontraerasorik egokiena». Horrela jartzen du, hitzez hitz, Irrintzi peñako komuneko zuloan aurkitutako paperetan.

Iazko maiatzean hasi zen Karrikiri operazioa. Bi hilabetez ia berrehun nafar infektatu ziren bertako zepa batekin. Nafarroako Unibertsitate Ospitalean aurkitu zuten koronabirus nafarra, 2021eko maiatzaren 19an. Bere izena B.1.575.2 da, baina Carlos Artundo Osasun zuzendariak Karrikiri izena eman zion. Zepa CIMA ikerketa gunean gorde zuten, une egokienaren zain.

Azkenik ailegatu zen eguna. Uztailaren 5ean infektatu zen Maia Karrikiri zeparekin. Bi egunetara kutsatzeko gai zen: prozesioaren egunean. Extremaduratik etorritako poliziek eskularruetan zuten zepa ere, protestan ari zirenen aurpegietan igurzteko gertu. Atzo jakinarazi zuen Maiak positibo eman zuela. Hala ere, ez da etxean gelditu. Sanferminak bider hiru ospatu behar dira, eta ez datorkio batere ongi.