Euskal Herriko beste hiriburuetan bezala, aurten Donostian ere ez da Aste Nagusirik izango. Festa giro jendetsua alde batera utzi beharra dago, tentuz eta arduratsu jokatzea beharrezkoa da.
Ideia honetatik abiatuz, Donostiako Piratek bizi den egoerara moldatutako egitarau bat prestatu dute aurtengo Aste Nagusirako. Piraten Setioa, ohiko Aste Nagusiaren alternatiba gisa. Egun bakarrera mugatu dute egitarau guztia. Piratek argi dute euren aldetik egitarau handi bat antolatzea ez litzatekeela arduratsua izango, eta, beraz, abuztuaren 10ean egingo dira ekintza guztiak. Aurten Donostiako piraten jaietan hain garrantzitsua den Mattiren pertsonaia tabernarien esku geratuko da, une gogor hauetan egiten ari diren lana eskertzeko asmoz.
Piraten hastapenen lekuko izan zen Donostiako alde zaharreko Trinitate plaza, eta han egingo dira jarduera guztiak. 12:00etan hasiko dira, haurrentzako ikuskizun batekin. Arratsaldean, 16:00etan J Martina taldearen kontzertua izango da, eta 19:00etan bertso musikatuak. Amaitzeko, Izan Pirata dokumentala emango dute 22:00etan.
Jaia segurtasunez aurrera eraman ahal izateko, ekitaldi guztietara aurrez hartutako sarrerarekin joan beharko da. www.donostiakopiratak.eus webgunean edo Pandora, Platero, Zulo zahar eta Belfast tabernetan, dohainik. Maskara erabiltzea derrigorrezkoa izango da, lekuak aurretik antolaturik egongo dira eta gel hidroalkoholikoa izango da sarreran.
Gaurko manifestazioa deitu dute Piratek 12:00etan Kristinaenea parkean, Donostiako gainontzeko jai batzordeekin batera, jai herrikoiak defendatu eta aldarrikatzeko asmoz.
Abuztua Donostian
Donostiako Udalak abuztuaren 8 eta 31 bitartean jarduera andana prestatu ditu. Hiriburuko auzoetan, bertsolariak, kontzertuak, txarangak, kirol tailerrak, haurrentzako ikuskizunak, dantza emanaldiak, txistularien alardea, herri kirolak...luzea da zerrenda. Ekintzetara joan ahal izateko, aurretik izena eman beharko da www.abuztuadonostian.eus webgunean, eta indarrean dauden segurtasun neurriak bete.
Donostiako ez-jaiak
Ez abordatzerik, ezta su festarik ere aurtengoan
Donostiako Piratek Piraten Setioa prestatu dute astelehenerako. Egitarau guztia egun bakarrean bilduko da. Donostiako udalak abuztu osorako ekintzak prestatu ditu: abuztuaren 8an hasi eta 31ra arte.
Iruzkinak
Ez dago iruzkinik
Ordenatu
