Oriok gaur bertan irabaz dezake Euskotren liga

Matematikak eta Orio ekuazio berean dabiltza aurreko asteburutik. Izan ere, honetan irabaz dezake Euskotren liga, hirugarren aldiz. Lehendabiziko eragiketa ezin hobeto atera zitzaion atzo Ondarroan, eta gaur Castro Urdialesen (Espainia), 11:40ean, atzoko emaitza bera lortzen badu, erregulartasunaren saria herrian sartuko du. Irabazi edo ez, Arraun Lagunaken aurretik sailkatzea nahikoa izango du. Zazpi puntuko koska ateratzen dio aurkari zuzenari, eta, hiru estropada baino geratzen ez direnez, gaur zortzira igoko baluke aldea, bale luke Euskotren ligaren jabe egiteko.

Ekuazioaren emaitza horraino heltzeko lehendabiziko eragiketa atzo irabaztea zen, eta lortu zuen. Bederatzigarren aldiz sartu zuen branka beste hiru aurkarien aurretik. Bi garaipen dauzka Arraun Lagunakek, eta alerik ez Donostiarrak eta Tolosaldeak. Hainbesteko nagusitasuna erakutsita, ez da harritzekoa liga lortzeko aukeraren jabe izatea asteburu baten faltan.

Atzokoa estu samar joan zen. 3,24 segundo gehiago bakarrik behar izan zituen Orioren aldean Arraun Lagunakek. Atzetik, Donostiarra 5,82ra sartu zen, eta Tolosaldeak 10,94 galdu zituen. Berdintasunaren oinarrian hainbat egoera izango dira, baina baliteke bat ondorengo hau izatea: itsasoa bare zegoen Ondarroan atzo. Denboralea lehertzeko arriskuarekin, baina Euskotren ligakoei lan egitea errespetatu zien eguraldiak.

Baretasun horretan, indarrak aparteko garrantzia izango zuen. Ohi bezala, arraunean txukun egiteak ere bai. Hori lortzeko eragozpen handirik ez zien jarri atzo, behintzat, itsasoak. Nahiz eta ur-laster handien egunak izan. Oriok laugarren kaletik egin zuen arraun, eta Arraun alboan zuen, hirugarrenetik. Tolosaldea joan zen hirugarrenetik, eta Donostiarra lehendabizikotik.

Hasi eta berehala samarrean, Arraunek hartu zuen burua, baina segundoa baino alde handiagorik ezin sartu Oriori. Batera joan ziren segituan une batez, eta Orio jarri zen gero buruan. Segundoa alde. Arraunek harrapatu egin zuen hura, eta une erabakigarria heldu zen: ziaboga aurreko eta ondorengo metroak. Buelta hartzen Orio izan zen azkarrena, segundo bat gehiago behar izan zuen Arraunek, hiru gehiago Donostiarrak, eta sei Tolosaldeak. Bigarren luzeari ekin eta berehala, bi segundora igo zuen aldea Oriok Arraunekiko. Nahikoa izan zen atzoko baldintzetan banderaren jabe egiteko.

Kale berean unebatez

Elkarren ondoan jarri ziren bi indartsuenak momentu batean. Epailea gerturatu ere egin zitzaien, baina bakoitza bere kalearen ertzean zihoan. Arraunek ababorrera gehiago egin, eta Orioren kalean pixka batez sartu zen arte. Epaileak bandera zuria atera zion, eta Andrea Astudillok istriborrera zuzendu behar izan zuen trainerua. Hiru segundora igo zuen aldea Oriok, eta horrela sartu ziren. Atzetik, Donostiarrak hiru puntura utzi du Tolosaldea.