Arrauna. LUGAÑENE BASERRITIK
Helburu biziak
Arraunean ligak oso azkar pasatzen diren sentsazioa izan dut beti. Lehiaketa oso intentsoa iruditzen zait, bai fisikoki, baita psikologikoki ere.
Duela hilabete eta erdi eman genituen lehen arraunkadak. Asteburuko garaipen eta porrotek ezin dute guregan denbora asko iraun; hurrengoaren bila joan beharra dago.
Lehenengo asteburua jokatu ondoren, sailkapenak talde bakoitza non dagoen dio. Hortik aurrera, gauden lekuan gaudela, lanean jarraitu beharra dugu. Lan psikologiko handia iruditzen zait ordukoa: urtean zehar ezarritako egitasmoak bete edo berrezartzeko unea.
Asteburuz asteburu helburu txikiak jarri, eta horiek betetzen saiatzea dator ondoren. Ez da lan makala. Guztiarekin asmatu beharra dago, eta, lan bikaina egin arren, ezer ez dago ziurtatua.
Gauzak nahi bezala ateratzen ez direnean, taldea elkartu eta aurrera jarraitu beharra dago, borrokan, elkarrekin disfrutatuz, guztion artean hurrengo helburuaren edo asteburuaren bila.
Igandekoarekin, hamalaugarren Euskotren Liga amaitu da. Aro honetako azken liga izan da, datorrenean zortzi ontzi arituko baikara lehian. Zorionak aurtengo irabazleei, baita hurrengo urterako tokia ziurtatu duten taldeei ere. Borrokan ari garen guztion artean berdintasunerako bidean pauso txikiak ematen ari garelako esperantzaz nago.
Orain, gogotsu eta ilusioz beteta helburu berrien bila joateko momentua iritsi zaigu. Goazen, ekipo!
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
