Bigarren Mundu Gerra espaziotik ikusgai, gaur, DMAX katean

Urtzi Urkizu -

2018ko apirilak 3
DMAX kateak —lurreko telebista digitalean doan ikusten da Hego Euskal Herrian— La Segunda Guerra Mundial desde el espacio dokumentala emango du gaur, 22:30ean. Bi orduko iraupena du lan horrek, eta gerra beste ikuspegi batetik ezagutzeko aukera emango du: estratosferaraino altxatuko du begirada. Horretarako, animazio digitaleko teknologia berritzaileenak erabili dituzte.

Bigarren Mundu Gerran garrantzitsuak izan ziren gertakizunak azalduko dira dokumentalean, irudiak garaiera handitik hartuta, eta, modu horretan, gatazkaren aldiberekotasuna erakutsiko dute. Pearl Harborren japoniarrek egindako erasoa, aliatuen Normandiako lehorreratzea eta estatubatuarrek Hiroshiman eginiko erasoa agertuko dira.

Gainera, Bigarren Mundu Gerrako beste pasarte batzuk ere ikusi ahalko dira: Ingalaterrako bataila, Stalingradeko setioa eta AEBetako tropen porrota Rommelen soldaduen aurrean Afrikako iparraldean. Azken bataila hori erakusteko, hiru dimentsioko mapa bat osatuko dute, eta bertan erakutsiko dute nola gelditu ziren harrapatuta estatubatuarren gudu orga korazatuak.

David Kennedy eta Richard Overy historialariek parte hartu dute dokumentalean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna