Marea gorriak estali du zerua

Jendetza bildu zen atzo Iruñean, Osasunaren igoera ospatzeko. Uxue Barkosek egin zien lehen harrera, eta ondotik Iruñeko Udalean jarraitu zuen bestak. Udaletxe plaza bete zuten zaleek.
Osasunako jokalariak Iruñeko udaletxean, zaleekin Lehen Mailara igo izana ospatzen. Plaza sanferminen pare bete zen.
Osasunako jokalariak Iruñeko udaletxean, zaleekin Lehen Mailara igo izana ospatzen. Plaza sanferminen pare bete zen. IDOIA ZABLETA / FOKU

Ainhoa Larretxea Agirre -

2019ko maiatzak 22
Kolore gorria zuen Iruñeak atzo arratsaldean. Gorriz jantzita zebilen jendea, eta kolore gorriko autobusean zebiltzan Osasunako jokalariak. Ospakizun handia zuten zaleek eta jokalariek: Osasuna Espainiako Lehen Mailara igo izana. 17:30ean atera ziren jokalariak Sadar estadiotik, eta hirian zehar itzuli txiki bat egin ostean, 18:15 aldera iritsi ziren Nafarroako Jauregira. Ordurako urduritzen hasia zen bertaratutako jendea. Haurrak ziren nagusi lehen ilaretan, eta gogoz zeuden jokalariak ikusi eta sinadurak eskatzeko. Jokalarien autobusa ikusi orduko egin zuen eztanda jaiak: oihuak, argazkiak... eta negar malkoak jausi zitzaizkion zale askori.

Jokalarien zain lehen ilaran zegoen Markel Martinez. Hamar zenbakia zuen margotua aurpegian, eta Roberto Torres zenbakiaren jabea ikusi orduko hasi zen salto eta oihuka. Jokalaria harengana hurbildu eta agurtu ondotik emozio betean zen. «Nire bizitzako egunik onena da», zioen hunkituta. Horrelako emoziorik gabe, baina pozarren zen Lurdes Ruiz zalea ere. Lehen Mailara igotzea merezitako saria zela zioen: «Hemendik aurrera helburua Lehen Mailan mantentzea da, hori da gure benetako lekua». Helburu bera zuen Markel Rosek:«Lehen Mailan luzaroan mantentzea nahiko nuke».

Bertaratutako zaleak agurtu eta jauregi barrura sartu ziren jokalariak. Uxue Barkos jarduneko presidentea zuten bertan zain. Ekitaldi instituzionala egin, eta jokalariak balkoira atera orduko berriro berotu zen plaza; zaleak kantuz hasi ziren, eta kantuz erantzun zieten jokalariek. Oier Sanjurjok hitza hartu orduko txalo zaparrada eskaini zieten zaleek eta kantuz erantzun zuten. Zaleek nahi baino lehen, ordea, jauregia utzi zuten.

Iruñeko udaletxera egin zuen festak. Jokalariak iritsi orduko beteta zegoen plaza sanferminetako txupinazoa balitz bezala. Bertan Joseba Asiron alkateak egin zien harrera, eta berriro ere atera ziren balkoira zaleak agurtzera. Marea gorri bat zuten zain bertan, bestetan ohikoa den zapi gorria soilik zuten falta. Jokalariek banaka hartu zuten hitza bertan, eta eskerrak eman zizkieten zaleei. Gogoz erantzun zuten zaleek oihuka eta kantuka. Euskarak ere izan zuen presentzia udaleko balkoian. Jokalari bat baino gehiago mintzatu zen euskaraz, eta Jagoba Arrasate entrenatzaileak bertso bat kantatu zuen. Ondoren, Kale Nagusian barrena San Fermingo kaperara joan ziren eskerrak ematera. Afari batekin biribildu zuten festa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna