Albistea entzun

Euskal Herriko Itzulia. PASIO BATEN ATZETIK Luis Angel Materen lagunak.

Katamotza ikusi dute Ondarroan

'Tropela' kinielan izen bitxia zuela ikusi, eta Ondarroako lagun kuadrilla batek bere kutun bilakatu zuen txirrindulari espainiarra. Erdi txantxetan hasitako bidea urteetan luzatu, eta edertu egin da. Aurten ere ongietorria eman diote.
Luis Angel Materen jarraitzaile taldeko kideak, herenegun, Zarautzen. Ezkerretik laugarrena da Mate.
Luis Angel Materen jarraitzaile taldeko kideak, herenegun, Zarautzen. Ezkerretik laugarrena da Mate. TXOMIN BUSTINDUI Tamaina handiagoan ikusi

Imanol Magro Eizmendi -

2018ko apirilak 4

Ondarroatik (Bizkaia) Marbellara (Espainia) 1.088 kilometro daude. Iberiar penintsulako bi muturrak dira kasik. Marbellakoa da Luis Angel Mate (Cofidis) txirrindulari beteranoa, eta Ondarroakoak Txomin Bustindui, bere kuadrilla, eta era berean Matek duen zale multzorik fidelena. Istorio hau ezin da behar bezala ulertu ondarroarrei egozten zaien umorerako sen berezi hori gabe.

Materi duela lau urte Ondarroa non zegoen galdetuz gero, litekeena da ez jakitea. Egun, baina, ziur kokatuko lukeela mapan. Izan ere, duela lau urte hasi zen istorioa. «Kuadrillan, Luis Angel Materen izena gustatu egiten zitzaigun. Luis Angel, xake-mate... Tropela kinielan ere beti hartzen hasi ginen. Inor gutxik hartzen zuen, eta hura animatzen hasi ginen», azaldu du Bustinduik. Norbait animatu nahi, eta bat behar zuten. «Baina hau nolakoa ote da? Pentsatu genuen, eta sare sozialetan oso aktiboa dela ikusi genuen —20.000 jarraitzaile ditu Twitterren, eta 13.500 Instagramen—. Bideo politak jartzen zituen, eta oso jatorra zirudien. Beraz, garbi izan genuen: gu Materen aldekoak izango ginen».

Materen aldekoak, eta nola gainera. Erreportaje serie honetako beste zale talde ia guztiek ezagutzen dituzte. Zortzi-hamar laguneko kuadrilla Itzulian irteten da bide bazterrean, eta azken lau urteetan ia etapa guztietan egon dira. Eta beti pankarta eskuan hartuta: Jake Mate EH-ko Itzuliari!, Luis Angel selekziora!, Ondarru ere Lince Andaluzekin!... Lince-k katamotza esan nahi du gaztelaniaz, hori baita Materen goitizena. Dagoeneko Itzulira osteratxoa egiteko aitzakia baino gehiago da.

Sare sozialetan hasitako bidea errepidera zabaldu zuten, eta Etxebarrin (Bizkaia) elkar ezagutu zuten. Cofidiseko autobusera gerturatu ziren, eta Materekin hitz egiten hasi. Hartaz geroztik, ia irteera eta helmuga guztietan joaten dira laguna agurtzera. Herenegun ere Zarautzera joan ziren ongietorria egitera. «Oso garbi genuen fenomeno bat dela, eta lehen egunetik oso gertukoa izan zen. Oroitzen naiz han Cofidiseko zale batzuk zeudela autobusaren inguruan, eta ea Mate ezagutzen genuen galdetu ziguten, eta guk baietz esan genien, betidanik».

Lau urte geroago, ez da zaila Bustindui eta bere lagunak Cofidiseko txapelekin uniformatuak ikustea. Matek laguntzen die txapelak eta botilatxoak emanez, baita paseren bat edo beste ere. «Umoretsua da. Oroitzen naiz urte batean ihes eginda ibili zela Orioko etapan. Zer moduz ibili zen galdetu, eta igogailu bateko tiroketa batean baino tentsio handiagoa egon zela esan zigun. Beste batean, Pingu pinguinoaren jaunartzean baino hotz handiagoa pasatu zuela esan zigun. Horrelako txantxak gustuko ditu».

Urteen poderioz, Cofidisen ere ezagutzen dituzte. «Laguntzaile batek esan zion behin: zure herrian ere ez zaituzte horren ondo tratatzen!». Matek, berriz, keinu ugari izan ditu sare sozialetan: «Hemendik aurrera beste ondarroar bat gehiago naiz. Gora iparraldeko jende on hori!», idatzi zuen. Bustinduik enbidoa hordago bihurtu du: «Ondarroako seme kutun bihur dezatela lortuko dugu!».

Bustindui, halere, aurretik topo egina zen Materekin —eskarmentu handiko ziklista da Mate, Vuelta eta Tourra seina aldiz bukaturikoa—. Bustinduik egun ultramaratoiak egiten ditu, baina txirrindulari afizionatua izan zen. Behin, Balmasedan (Bizkaia) lasterketa batean parte hartu, eta Materekin lehiatu zen. «Matek hamabigarren bukatu zuen; nik, oso atzean. Ilusioa egin zidan hori jakiteak».

Lagunek egin diote Ondarroan agertzeko gonbita Materi, eta hark bueltan ere bai Marbellara. «Nahi badugu han etxea daukagula esana digu. Deskuidatzen bada, han agertuko gara denak. Baina zaila da topo egitea, txirrindulariek egun asko egiten dituzte kanpoan». Horren aurretik, Itzulian dute aurtengo hitzordua. Ez da zaila haiek aurkitzea.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Iker Muniain eta Leo Messi, Athleticeko eta Bartzelonako kapitainak, Cartuja estadioan, atzo, kopa atzean dutela. ©ESPAINIAKO FUTBOL FEDERAZIOA

Debekatua beste bat galtzea

Aitor Manterola

Athleticek 25. aldiz irabazi nahi du gaur Espainiako Kopa, eta, horretarako, Bartzelonari irabazi beharko dio Sevillan. Azkenekoz 1984an lortu zuen, eta ordutik jokatu dituen lau finalak galdu egin ditu
 ©BERRIA

Bihotzerrea sendatzeko bi hamaikako

Berria

Bartzelonak superkopa galdu zuen Athleticen kontra, duela hiru hilabete, eta Athleticek kopako finala, Realaren kontra, orain bi aste. Galdutako finalen bihotzerrea kitatzeko prest aterako dira bi taldeak zelaira, borrokara.

Jon Ander Albisu eta Jose Javier Zabaleta.  <br />
<br /> ©IÑIGO URIZ / FOKU

«Atzelarien txapelketa da hau»

Julen Etxeberria

Fernando Goñik finalerdietako lau atzelariak aztertu ditu. Jose Javier Zabaleta eta Jon Ander Albisu nabarmendu ditu, eta haien arteko finalaren alde egin du.

San Mames estadioa. ©Luis Tejido / EFE

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna