Albistea entzun
Emakumeen aurkako indarkeriari ez
Emakumeen aurkako indarkeriari ez
Emakumeen aurkako indarkeriari ez

Laia Salsamendi

Oraina eta etorkizuna

Zeresana ematen ari da Salsamendi pilotaria. 14 urte baino ez ditu, baina maila ikusgarria duela erakutsi du, eta gai izan da goi mailako pilotariei irabazteko. Bideaz gozatzen ari dela dio, eta horretan jarraitu nahi du. Orain min hartuta dago.
JUANAN RUIZ / FOKU Tamaina handiagoan ikusi

Jone Bastida Alzuru -

2021eko urriak 26

Lehiatzen gozatu: hori da Laia Salsamendi pilotari gazteak (Etxauri, Nafarroa, 2006) egiten duena. Eta, bide batez, zaleek ere disfrutatzen dute hura ikusten. 14 urte besterik ez dituen arren, onenen pare dago. Maila ikusgarria ematen ari da, eta txapelketa garrantzitsuak irabaztea ere lortu du. Udan, besteak beste, Nafarroako Foru Komunitateko torneoan gailendu zen binaka, eta Antiguokoa irabazi zuen banaka. Ados Pilota elkarte sortu berriak antolatutako Plazaz Plaza txapelketan ere nagusitu zen, Oihana Orbegozorekin batera. 14 urte ditu, baina ez da soilik etorkizuneko pilotaria; oraina ere bada. Kantxan gailentzen ari den harribitxia.

Bide oparo horretan, ordea, eten bat egin behar izan du: belaunean min hartuta dago, eta lesioa luzerako izango dela dirudi. Halere, behin kolpea hartu eta jazotakoa irentsita, indarrez dago datorrenari heltzeko. Kantxara itzulera du buruan, eta lan egingo du horretarako. «Errehabilitazioan ari naiz, kantxara ahalik eta lasterren bueltatzeko», azaldu du. Aitortu du lesioa kolpea izan dela, oso ondo zebilelako, baina heldutasunez heldu dio: «Kirolean hau gertatzen da, eta niri tokatu zait. Orain errekuperatzea dagokit, eta inoiz baino hobeto itzultzen saiatuko naiz».

Salsamendiren ibilbideari errepasoa egin dio Maite Ruiz de Larramendi pilotariak (Beasain, Gipuzkoa, 1973), eta dituen dohainak aztertu ditu: «Pilotan aritzeko behar diren gaitasun guztiak ditu. Polita egiten du, erraz». Indarguneak zeintzuk diren galdetuta, hala erantzun du: «Denak, esango nuke». Jokoa ikusten dakien pilotaria dela dio. «Niretzat, Laiak [Salsamendi], sake perfektua ateratzen du, indartsua; min handia egiten du. Eta oso lasai egiten du, tenple handiarekin. Airetik ondo ematen dio, boleaz ere bai. Beti daude hobetzeko gauzak, noski, baina kolpe guztiak menderatzen ditu. Landu ditu, eta emaitza hor dago: oso polita egiten du».

Horrez gain, pilotalekuan duen ausardia eta patxada nabarmendu ditu Ruiz de Larramendik. Haren arabera, ez da kikiltzen, eta tenplea du. «Gai da 10-1 atzetik joanda markagailua irauli eta lasai irabazteko. Makineria konektatzen duenean, armategi osoa ateratzen du, eta dominatzen ditu airea, gantxoa, bolea, sotamanoa... Haren pilotakada guztiek asmo bat dute». Argi esan du: «Banaka, dena irabazteko gai ikusten dut. Laia [Salsamendi] egun dagoen pilotaririk osoena da». Onartu du disfrutatu egiten duela hura ikusten. Orain lesionatu izana «pena» dela dio, baina gogorarazi du «ibilbide luzea» duela aurretik. «Garrantzitsuena belauna ondo errekuperatzea da, behar duen denbora hartuta. Eta itzultzen denean, ilusioarekin eta gogotsu bueltatzea; berriro dena eman eta borrokatzera». Etorkizun eta orain itxaropentsua dituen pilotaria dela dio.

Hain zuzen, udan nabarmendu da gehien Salsamendi. Etxauriko pilotariak esan du ez zuela espero halako partidak jokatzea, baina lanaren fruitua izan dela: «Saiatu naiz nire maila ematen, eta oso gustura nago. Gogor entrenatu naiz, dena eman dut beti, eta sentipen oso onekin geratu naiz. Hor goian egoten jarraitu nahi dut». Azaldu duenez, bideaz gozatzen ari da, eta hala segitzeko gogotsu dago.

Egunotan Herbehereetan egon da euskal pilota selekzioarekin, Europako Junior Pilota txapelketan. Lesioa tarteko, ezin izan du jokatu, baina «egundoko esperientzia» izan dela aipatu du. «Oso gustura egon naiz, ikaragarrizko jende ona da. Ikusi dut nola jokatu duten, eta animatzera joan naiz».

Pasioarekin hitz egiten du Salsamendik pilotaz. «Niretzat dena da». Azaldu du haren helburuetako bat beti izan dela profesional izatea, baina, hala ere, urratsez urrats joan nahi du, gozatzen; baita emakumezkoen pilotak hazten segitzea ere.

Bidean segitu

Azken urteetan loraldia izan du emakumezkoen eskuzko pilotak. Neska pilotariek lehen lerrora jauzi egin dute, eta egoera berrira egokitu eta emakumeen pilota haziz joateko lanean ari dira. Horren adibide da maiatzean Ados Pilota izeneko lehen klub profesionala sortu izana. Ruiz de Larramendi da egitasmoaren bultzatzaileetako bat, eta azaldu du «behar» baten ondorioz sortu zela. Aurrerapausoak eman dira, baina ez nahikoak.

Halere, Ruiz de Larramendik gogorarazi du garai batean emakumeek adin batera iritsitakoan pilota utzi edo palara pasatu behar izaten zutela, halabeharrez. Ez zegoen modurik eskuzko pilotan jarraitzeko. «Hori ez zaio gertatu Salsamendiri. Hor dago diferentzia. Inork ez dizkio hegalak moztu, eta hobetzen jarraituko du».

Bide horretan segitu ahal izatea «gozamena» dela dio. «Zorte handia da Salsamendik eta bere adineko guztiek ez dutela gelditu behar izan. Gertatu ahal zaien onena da. Laiak hau aprobetxatu behar du, bizitzen ari den guztia, eta, benetan gustatzen bazaio, jarraitu ditzala urte asko pilotan. Etorkizun oparoa du».

Salsamendik ere adierazi du gero eta neska gehiago aritzen direla pilotan, eta alde horretatik «oso pozik» dagoela. Eskerrak eman dizkie «hor ari diren» emakume guztiei.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Alaveseko jokalariak, burumakur. ©Endika Portillo / Foku

Elurpean gelditu da Alavesen bolada ona

Eñaut Agirrebengoa

Arabako taldeak galdu egin du Celtaren kontra, Mendizorrotzan, eguraldi petralak baldintzatu duen partida orekatu batean. 

 ©RAUL BOGAJO / FOKU

«Betidanik lehenetsi dut Euskal Herrian jokatzea»

Iñaki Berastegi

Brust sasoia amaitu arte ariko da Eibarren, eta uste du «talde bezala» gehiago jokatuz gero badutela aukerarik oraindik ligan. Sant Cugaten zelaian ariko dira gaur (12.00).
2018ko Masters torneoko finaleko partida, Nafarroa Arenako pilotalekua jendez lepo beteta dela, Iruñean. ©IÑIGO URIZ / FOKU

2022ko buruz buruko finala Nafarroa Arenan jokatuko da

Mikel O. Iribar

Maiatzaren 29an izango da partida, 3.000 eserlekuko pilotalekuan. Masters torneoko bi finalerdiak eta finala ere bertan jokatuko dira

Victor Laguardia Alaveseko kapitaina, Sevillaren aurka sartutako gola ospatzen, Sanchez Pizjuanen. ©JOSE MANUEL VIDAL / EFE

Denbora kontua izan da

Eñaut Agirrebengoa

Itxaroten jakin duelako arnasberritu da Alaves, Javi Cabello teknikari laguntzaile ohiaren aburuz. Arabarrek Celta hartuko dute gaur (14:00).

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.