Gaur hasiko da Locarnoko 75. Zinemaldia
ZINEMA. Pandemiak azken bi urteetan jarritako oztopoak atzean utzita, gaur abiatuko dute Locarnoko 75. Zinemaldia (Suitza). Ohiko formatuan egingo dute jaialdia; izan ere, bertan behera utzi zuten lehiaketa 2020an, eta edukiera murriztuta egin zuten iaz. Jaialdia ezaguna da, batik bat, herriko plazan egiten diren aire zabaleko emanaldiengatik. Sail Ofizialari dagokionez, mundu osoko zinemagileen hamazazpi film lehiatuko dira guztira. Edonola ere, eta lehiaz gaindi, antolatzaileek Latinoamerikako eta Karibeko zinema sustatuko dute, atal propio batekin. Zinemaldiak Costa Gavras greziar jatorriko frantses zinemagilea eta Matt Dillon aktore estatubatuarra ere omenduko ditu, beren ibilbideagatik. Urrezko Lehoinabarra saria jasoko du, halaber, Kelly Reichardt gidoilari eta zuzendari estatubatuarrak; AEBetako zinema independetearen ordezkaririk ezagunenetako bat da gaur egun.
Iruzkinak
Ez dago iruzkinik
Ordenatu