ELAk dio oinarrizko errentak ez dakarrela hobekuntzarik

BILBO. ELAren arabera, Espainiako Gobernuak onartu berri duen bizitzeko gutxieneko diru sarrerak oro har ez du hobetuko Eusko Jaurlaritzaren eta Nafarroako Gobernuaren babes sisteman daudenen egoera. Eta bi gobernuentzat ere ez du etekin nabarmenik ekarriko, «dirua aurreztuko dutela azpimarratu duten arren».

Sindikatuaren arabera, neurriaren ondorioz ez da onuradun gehiago izango, salbuespen gutxi batzuk kenduta. Era berean, ez ditu konponduko Jaurlaritzaren diru sarrerak bermatzeko errentak eta Nafarroako errenta bermatuak dituzten «gabeziak». ELAk uste du diru sarrera horiek baliatu beharko liratekeela langabe guztien eta bakarrik bizi direnen errentak gutxienez lanbide arteko soldataren parekoak izan daitezen, eta %50 gehiago jaso beharko lukete beren kargura pertsona bat izanez gero.

Espainiak gutxieneko errenta onartu izanak ere izan du beste ondorio bat: Eusko Jaurlaritzak eta Nafarroako Gobernuak kudeatuko dutela. ELAk, baina, azpimarratu du horrek ez duela «etekin ekonomiko» nabarmenik ekarriko. Transferentzia gauzatu ondoren —«teorian, urriaren 31n»—, oso antzekoa izango da «saldo ekonomikoa», eta, eskualdatzea gauzatu arte, gerta liteke euskal administrazioek jasotakoa baino zertxobait gehiago eman behar izatea, kupoaren eta ekarpenaren bidez.