ZORNOTZA. Behargin bat hil zen atzo Zornotzako Aludium aluminio lantegian (Bizkaia) pala bat gainean erorita. UGT sindikatuak jakinarazi zuenez, Verman enpresarentzat egiten zuen lan, mantentze lanetan.
UGTk gaitzetsi egin du lan istripua, eta lantegiari eta azpikontratari galdegin die beharrezko segurtasun neurriak aplikatzeko, halakorik berriro gerta ez dadin. Horrez gain, elkarretaratzera deitu du uztailaren 6rako: sindikatuaren Bilboko egoitzaren parean egingo dute, 12:00etan.
Euskal Herrian 42 behargin hil dira aurten lanean zebiltzala, LAB sindikatuaren webguneko zenbaketaren arabera. Atzokoarekin, hamabi behargin hil dira Bizkaian; hamarna Gipuzkoan eta Nafarroan; bost Araban; bat Iparraldean, eta hiru kanpoan zirela.
Aurreko laneko heriotza herenegun izan zen, Luiaondon (Araba). A-625 errepidean talka egin zuten autobus batek, kamioi batek eta furgoneta batek. Furgonetan zihoan laguna, kale saltzailea, hil egin zen, eta beste lau zauritu ziren.
Langile bat hil da Zornotzan, pala bat gainera erorita
Iruzkinak
Ez dago iruzkinik
Ordenatu
