ESKUBALOIA. Euskal Herriko eskubaloiarentzat egun polita da gaurkoa, derbia dutelako Zubileta Evolution Zuazok eta Super Amara Bera Berak Barakaldon (12:00, ETB1). Ohorezko mailako 21. jardunaldiko partida da, eta, sailkapenean aparte badaude ere bi taldeak (bizkaitarrak bederatzigarren 19 punturekin, eta gipuzkoarrak aurrena 37rekin), ez harritu uste baino berdintasun handiagoa izatea.
Atzo, Bera Beraren fabore, Gijonek galdu egin zuen Morvedreren etxean, eta sei puntu aurretik dira orain Imanol Alvarezenak. Malaga jarri da bigarren, eta, gaur Donostiako taldeak irabaziko balu, zazpi punturen koska jarriko luke, bost jardunaldi falta direla.
Asobal ligan, Bidasoak atzo jokatu zuen 23.jardunaldiko partida, eta irabazle izan zen Navaren aurka (28-26). Uste baino gehiago kosta izan zitzaion, ondo ekin bazion ere, hiruzpalau golen aldearekin. Bost minutu falta zirela, Navak gol baten aldea hartu zuen (24-25), baina etxean geratu zen garaipena. Bigarren segitzen du Bidasoak.
Zuazok eta Bera Berak derbia dute gaur
Iruzkinak
Ez dago iruzkinik
Ordenatu