Sei aizkolari ariko dira bihar Donostian, Urrezko Kopa xede

AIZKORA. Sei aizkolarik balio handiko txapela jokatuko dute bihar arratsaldean Donostiako Trinitate Plazan (19:30). Urrezko Kopak toki berezia du herri kirolen udako egutegian; hura da onentsuenak biltzen dituen udaldiko lehia.

Historikoki, Euskal Herriko txapelketako bost onenek izan dute Aste Nagusian aritzeko lekua. Aurten, ordea, kanporaketa jokatu dute aizkolaritzako zatiketa tarteko.

Mikel Larrañaga nagusitu zen uztailaren 16an jokatutako sailkatze proban —azpeitiarra da Urrezko Kopako egungo txapelduna —. Harez gain, Atutxa II.a, Iker Vicente, Txikia IV.a eta Bihurri II.a ariko dira garaipenaren bila.

Haien artean, Atutxa II.a da Donostian gehien nagusitutakoa: lau bider. Vicentek bi aldiz irabazi du, eta Larrañagak behin, iazko sariketan. Gainontzeko sailkatuek ez dute garaipenik eskuratu. Sailkapen historikoan, Floren Nazabalek ditu garaipen gehien: bederatzi aldiz nagusitu da.

Urrezko Kopak lan jarraia bezain gogorra du ezaugarri nagusi. Aizkolariek hamalau kana-erdiko ebaki beharko dituzte bata bestearen atzetik. 54 ontzako enborrak dira. Lanak azkarren egiten dituena, txapeldun. Gaur-gaurkoz, Donato Larretxeak du probako markarik onena (27:17). 1995ean ezarritako langa da.

Zaila aurreikusten da hura haustea. Urrezko Kopara lan karga bertsuarekin ailegatuko dira aizkolari guztiak. Uda sasoia erakustaldi garaia izaten da aizkolarientzat, txapelketak hasi aurretik. Urrezko Kopako bost finalistetatik lau —Txikia IV.a, Larrañaga, Atutxa eta Vicente— Sunbillan (Nafarroa) aritu ziren atzo Ramon Latasaren oroimenezko sariketan. Atutxak eta Otañok osatutako bikotea nagusitu zen, 30.19ko denbora eginda.

Halaber, atzo jokatu ziren Urrezko Koparekin lotura estua duten Igeldoko eta Uliako harrien txapelketak, Donostian. Gizonezkoetan, Mikel Lopetegik irabazi zuen Igeldoko harriaren lehia, 134 kiloko harriari hamazazpi jasoaldi eginda. Lehen aldiz jokatu zuten Emakumezkoen Ulia Harriko Txapelketa. Hamar lagun aritu ziren lehian, eta Karmele Gisasola izan zen garaile, 70 kiloko harria hamasei aldiz jasota.