Aspeko bikoteek hasiko dute finalerdietako ligaxka

PILOTA. Binakako Txapelketaren finalerdietako ligaxka hasteko ordutegiak ezarri zituzten atzo. Aspeko bikoteek jokatuko dute lehenik elkarren aurka, eta, ondoren, Baiko Pilotakoen txanda izango da. Hala, Ezkurdia-Martija Jaka-Zabaletaren aurka ariko dira lehenengo partidan, datorren larunbatean, Iruñeko Labrit pilotalekuan (17:30, ETB1).

Bikoteek pilota aukeraketa bihar egingo dute, Labriten (11:00). Lehen ligaxkako bi bikote onenen arteko norgehiagoka izango da. Jaka-Zabaleta gainerako lehiakideei nagusitasunez gailendu zitzaizkien hamalau jardunalditan, hamabi partida irabazi eta soilik bi galduta. Ezkurdia-Martijak, berriz, azken-aurreko jardunaldian azken unean lortu zuten zuzeneko sailkapena, Laso-Albisuri 22-21 irabazita. Bederatzi partida irabazi, eta bost galdu zituzten. Elkarren aurkako lehiei dagokienez, bana irabazi zuten: 20-22 Jaka-Zabaletak lehen itzulian, eta 22-19 Ezkurdia-Martijak bigarrenean.

Finalerdietako ligaxkako bigarren norgehiagoka, berriz, igandean jokatuko dute. Olaizola II.a-Urrutikoetxea Laso-Albisuren aurka ariko dira, Bilboko Bizkaia pilotalekuan (17:00, ETB1). Materialaren aukeraketa etzi egingo dute, toki berean (11:00). Joan den asteburuko kanporaketetan sailkatu ziren bi bikoteak. Laso-Albisuk Altuna III.a-Galarza kanporatu zituzten herenegun (22-15). Olaizola-Urrutikoetxeak, berriz, Artola-Imazi irabazi zieten joan den larunbatean (22-17).